港版國安法大前晚殺到埋身，演藝界瀰漫白色恐怖，即使電影成功過電檢，各大院線戲院也自我審查。導演崔允信創辦的影意志，近年推出《佔領立法會》、《理大圍城》、《散後》及《分域大道》等社會紀錄片，但因題材敏感，均被各戲院拒諸門外。崔允信直指自我審查比起2015年的《十年》更嚴峻，已到史無前例的局面。
發行梁天琦紀錄片《地厚天高》的影意志，再推出《佔領立法會》、《理大圍城》、《散後》及《分域大道》等電影，內容全涉及近年的抗爭運動，被視為離經叛道。成為「禁片」白武士的崔允信，日前在貼滿文宣的辦公室接受《蘋果》專訪，提到為紀錄片找戲院上映，他說院商朋友曾提醒他︰「你啲戲多人睇一揚咗就大件事。如果冇人睇、冇人知，又放嚟做乜。」崔允信笑着說︰「唔可以話佢錯，一向有邀請院商嚟睇試片，好似《地厚天高》咁，佢哋仲去張poster度打卡，有啲導演、幕後都睇咗，不過唔出得聲。講到上映，你都知個答案。」
崔允信早前透過中間人找戲院放映《佔領立法會》、《理大圍城》等電影，結果一如所料︰「好多直接話唔得，佢哋全部都知呢套戲，呢個係開心地方。有一、兩間係考慮過推。」崔允信指情況是比起2015年的《十年》更嚴峻，自我審查達到史無前例，他說︰「《十年》個數咁好，都只係由一間戲院轉去另一間，一條院線做完到另一條，頂籠得兩、三間，商業社會收得好應該好多間院肯做，但一路都冇。直到贏埋金像獎最佳電影，好多老闆出聲，之後都冇上返。」
社區放映覓出路
崔允信指由2016年陳梓桓執導的《亂世備忘》開始，已很難找戲院播放，最叻是筲箕灣一間獨立戲院放過幾場，前年更遭所有戲院拒絕。崔允信希望想觀眾知道情況，願意多花時間去偏遠但肯放映的地方欣賞，他同時也理解院商︰「香港搞戲院嗰批喺內地全部有戲院，又投資電影，就算放映經理想幫我，上頭一定唔肯。」他說目前送檢沒問題，只是戲院自我審查，收窄放映空間。
港版國安法大前晚生效，自我審查更變本加厲，情況預料會百上加斤，崔允信說︰「商業戲院一路唔做，已經再冇得變本加厲，《地厚天高》戲院連包場都唔敢接。」他認為社區放映未嘗不是出路，會積極嘗試，又反問電影發展局，以及立法會體育、演藝、文化及出版界議員馬逢國︰「係咪需要講吓嘢？雖然對佢哋冇期望。」
難再拍同類電影
《散後》雖然是愛情故事，但以雨傘運動到逆權運動作背景，當中同時加插運動畫面，同樣變成「禁片」。導演陳哲民日前與演員馮海銳與陳烈文接受訪問，陳哲民認為將來可能無法再拍同類型電影：「有啲事可以做就盡力做，到發生時就去面對。如果任何事你覺得應該做，唔應該因為恐懼唔做，創作就是天馬行空。」他坦言做導演當然嚮往在大銀幕放映︰「係有擔心過題材排唔到戲院，不過乜嘢都擔心，就乜都唔使做。」他笑言根據首部劇情計劃條款，要在戲院上夠場數，才收到尾期。談到國安法下，電影會否成打壓目標，他說︰「部戲冇講港獨，亦已過咗政府程序，惟有見步行步。」
馮海銳也表示最不想見到創作自由被扼殺︰「如果鬧警察係黑警要道歉，咁唔好拍警匪片，《PTU》講差佬打人喎！咁杜琪𥧌係咪要道歉？」陳烈文接戲時剛大學畢業，原已獲聘做教師，但因此放棄教席。他說世事難料，但接拍《散後》至今未有包袱︰「我又唔係大明星，唔會有團隊叫我『文哥你唔好拍呢部戲啦』。」