美斯周二終於達到職業生涯第700個入球里程碑，但主場嘅巴塞隆拿喺兩度領先下俾馬德里體育會逼和2:2，以33戰得70分排喺聯賽榜第2位，落後榜首踢少場嘅皇家馬德里一分，爭取衞冕再受打擊。美斯今場射入一球12碼，令佢喺巴塞嘅入球去到630球，加上阿根廷國家隊嘅70球，職業生涯入球數字去到700球，同舊年達成呢個目標嘅基斯坦奴朗拿度（C朗）睇齊。更厲害係美斯只係用咗862場，比C朗嘅974場少成百場就完成呢個創舉。值得一提係今場波4個入球有3球嚟自12碼，而巴塞所失兩球12碼都有爭議。加泰媒體好似《每日體育報》就指出巴塞今季俾人罰12碼次數比對上4季都多，𠵱家已經輸咗7球，僅次於07/08球季嘅11個及02/03球季嘅8個，好似俾人針對咁。