長者勸移民 青年:我個根喺度

長者勸移民 青年:我個根喺度

【本報訊】國安法刊憲後香港變天,送中危機迫在眉睫,港人站在移民或留守的分叉路上,兩代人看法有分歧。老一輩認為,為下一代前途着想,年輕人應盡快移民,「有能力嘅,走得好走啦」;但年輕人仍想憑自由意志,留在香港「捱得幾耐得幾耐」。

憑信念「捱得幾耐得幾耐」


退休人士梁太昨午到銅鑼灣支持民主黨獎券籌款街站,她認為國安法條文大幅收窄言論自由,連向政黨捐錢都可能犯法,怕被指控資助對方勾結外國勢力,「我係驚,我真係驚,但我仲想有自由,噚日、前日有嘅自由,以後我嘅仔女都應該有,所以我要出嚟爭取,爭取未必有,但唔爭取就一定冇」。

她說不打算移民,但明白如選擇留下就要承擔風險,盡力適應國安法,「我識得嘅嘢唔多,只係做認為應做嘅事,香港人做好本份,令世界同情我哋,做唔做順民係睇自己心態」。梁太的子女一早已舉家移民到西方國家,「佢哋牙煙呀,仲有細路」。

身穿黑衣上街的彭女士攜同孫兒到銅鑼灣逛街,國安法出台令她擔心下一代前途和人身安全受威脅,積極考慮移民英美,讓孫兒接受良好教育,「有能力嘅移咗民係好啲,特別有小朋友」。她批評國安法案件管轄條文不公不義,審案法官由特首欽點,不設陪審團,涉及國家機密案件更要閉門審訊,絕對不能接受,「如果政府肯聽民意就唔會搞成咁」。

惟年輕一代卻有不同看法,周小姐說堅拒因惡法離開,希望「捱得幾耐得幾耐」。「我哋個根喺度,擔心(國安法)?邊個唔擔心呀?」但她不感絕望。她含淚說深信香港人自由意志堅定,即使表面上被迫噤聲,仍要心存希望,「(希望來自於啲乜嘢?)其實都唔知㗎,係信念,可能仲有希望」。