周二英超聯賽，曼聯憑住小將格連活特嘅入波，加上波基斯費南迪斯（B費）梅開二度，作客輕鬆贏白禮頓3:0。數吓數吓，原來「綠木仔」今季喺英超已經入咗六球，係自從03/04球季幫愛華頓入咗9球嘅朗尼之後，單季喺英超入波最多嘅18歲或以下球員，而佢喺各項賽事加埋已經入咗13球。相比起隊友拉舒福特，後者喺19歲生日前其實亦只係累積為曼聯入咗12球，一拍埋就知格連活特有幾勁。
3:0輕取白禮頓
今年10月先年滿19歲嘅格連活特，上季先至升上曼聯一隊，今季佢喺各項賽事已經為紅魔踢咗40場波，領隊蘇斯克查亦大讚「綠木仔」係一個有潛質成為頂級球星嘅天才，一定要悉心栽培佢咁話。除咗踢波犀利之外，格連活特仲相當有情有義，佢慶祝嗰陣做咗個「A」字手勢，原來係要將入球獻畀啱啱約滿離隊嘅好兄弟安祖高美斯。
除咗「綠木仔」之外，有兩球斬穫嘅B費今場都好鬼搶鏡，呢位葡萄牙中場加盟曼聯之後，13場波已經入咗6球同交出4次助攻，絕對係紅魔近排喺各項賽事夾埋15場不敗嘅功臣。對於球迷非常期待佢同保羅普巴嘅組合，B費就話，能夠同呢位法國球星合作真係好開心，但向來都好重視團隊發揮嘅佢話明，其實同所有隊友都好合拍，所以無謂太集中講普巴，最緊要係幫曼聯攞晒三分。佢仲特登點名大讚近排成日犯錯嘅迪基亞，話好開心見到佢救咗2、3球靚波。自己轉會後第一次起孖嘅佢都記得同隊友分享功勞，B費真係唔話得。
B費咁勁全靠飲奶
曼聯喺B費加盟之後脫胎換骨，成隊生猛晒，佢嘅一舉一動都受到高度注視，今場波佢被換走嘅時候，鏡頭就發現佢返咗上後備席飲奶。英國傳媒即刻言之鑿鑿咁話，B費咁犀利嘅秘訣就係飲奶，睇嚟好快就會有牛奶品牌搵佢做代言人。