國際級大賓架John McFarlane跟金融時報午餐視像訪問講，佢好信風水，道理好簡單，當風水師講畀你聽，在總裁辦公室一個角落擺一盆植物，銀行利潤會反彈，你信唔信？梗係信佢講，擺一盆植物在角落啦！此乃出於寧可信其有，不可信其無嘅道理，擺盆植物在角落，成本甚細，心理安樂吖嘛！渣打銀行1990年代初兩位大人物，行政總裁Williamson及賓架麥如此信風水，簡直係聞所未聞。近十幾年來，渣打飽經憂患，唔知係唔係新管理層唔再信風水之故呢？若非疫情阻隔，洪丕正應該飛去墨爾本執弟子之禮，向前輩賓架麥請教吓至得，賓架麥做渣打香港集團執行董事之時，洪丕正還只是新仔一名，未必知道當年大老闆有風水顧問Patrick Wong嘅噃。
風水輪流轉，三十年前滙豐渣打控制香港金融，滙豐嘅「獲多利」與渣打嘅「寶源」做晒香港上市及收購合併大刁，依家寶源冇咗，獲多利回歸滙豐投資銀行部，已寂寂無聞。今天美資行佔盡上風，中資佔領灘頭，英資行已冇地企，但滙豐渣打仍要在香港及中國市場搵食，北京要佢哋支持乜就支持乜，國安法唔知有乜內容之前，已應聲附和，懶理祖國（兩者之祖國係英國）嘈到坼天。
港版國安法內容宣佈之前，香港四人幫即譚耀宗，葉國謙，譚慧珠與梁愛詩已不停接受訪問，聲言不反映反對聲音，要反映強硬派意見（即可判終身監禁，有追溯期），都幾驚嚇。星期日晚到沙田馬會食飯，遇到一名年輕會員，係公務員，佢話好多政府公務員不滿意聶德權言論，但份工薪水幾高，離開政府恐怕搵唔番，故此與其他同事敢怒不敢言，講士氣就冇晒㗎嘞，有好路數就會認真考慮鬆人。香港人呢次因國安法離港，一定唔會大鑼大鼓，而係靜靜雞先送走仔女去外國讀書，其後再圖謀。據虎媽A講，佢有好幾位朋友嘅仔去咗考男拔附小，二，三或四年級，原因係男拔附小有插班學額。事緣有學生下學期（今年九月）去咗外國吖嘛。問虎媽A：「有幾多個學額呀？好易入小男拔呀？」虎媽A話：「你就想，朋友話幾百男童參加入學試呀！」小男拔有插班學額，相信其他富貴名校亦有。虎媽A告知：「有小學已出信問家長，貴子弟會否在本校升班唔走，好明顯係知道部份學生在六月復課後，根本唔返學，故有此一問！」田雞過河一幕，正默默地上演。