国安法的波板糖=跨境通？正在緊急維修水電免我們全屋於滲水剝落石屎兼大停電的恐懼的師傅，閒時愛炒細股，喃喃自問。
信口開河幻想阿爺塞波板糖入佢口那條賤友，雖然極盡意淫，但從來無被歸類自己友，門外漢都冇預佢一份，隨時反高潮，第一個即晚舟，無人可憐！
国安法黑幕吹風，預告即拉黎智英與黃之鋒，等同預訂國際頭版。兩位捍衛自由的勇士繫獄，戰狼堅再奸都難以應對外國傳媒。下令大灣區有銀用土豪倒錢入港交所啦嘛，抵消到正常人的心理震撼嗎？跨境通擺明大撒幣，幣少有少少常識吧，又拉又撒，得個桔。一萬蚊和保就業的公帑，亦等於倒咗落坑渠。針對年輕人尤其是眾志被點名那一班細路，雖然腦生蟲的高官「渴望已久」，但戇久係佢嘅事，金融中心必須「長長久久行穩致遠」……噢不會太遠了，斷言2047一定由軟變硬，王冬胜這批英資高層已成化石，黨員進駐，換旗都慳返。
拉緊電箱中的紅線的師傅，驚跨境通是打龍通，問我落唔落疊好。離開唔代表放棄與懦弱，既然後生仔咁講，老餅雖然食塵但打過逆權抗爭的仗，救生艇預留畀高危的後生好了。知命、留守，但獅子銀行唔派息咁衰喎，銀髮無需再疑慮，一於賺藍銀，幫黃圈，救後生，撐蘋果。