八方仲係學生時，教授成日叮囑勿做Deadline Fighter，時間太趕好多嘢自然錯漏百出，交功課最好檢查吓，有時原來未上載，考第一都變第七。自詡「年年考第一」嘅林鄭，噚晚有一個死線，要趕及喺7.1凌晨12點前，刊憲實施港區國安法。林鄭結果好叻叻，喺死線前一個鐘刊憲。交到功課心情確係爽，朝早出席回歸酒會時套衫都襯晒色。
呂秉權：政府未夠重視
不過喺浸大教書嘅呂秉權非常眼利，按正常程序，人大常委將法例納入附件三後，香港政府先會正式刊憲實施，但特區政府基本法網頁，仍未將港區國安法納入附件三，呂秉權仲喺facebook貼文恥笑政府對國安法似乎未夠重視，自製「國安漏洞」。八方截稿前再查看，發現港區國安法仍未見影，最新附件三法律仲係「國歌法」。可能因為林鄭前晚太夜交功課，負責基本法網頁嘅EO都放晒工，尋日又咁啱係公眾假期無人返工，最快可能今日先更新網頁。港區國安法呢個國家送畀香港嘅大禮，如果因為政府小小出錯而被JR，喜事分分鐘變衰事喇。