【本報訊】黃色光環是雙面刃，國安法殺到，「知名黃店」四個字帶來一定負擔，老闆們各有睇法。Mijosu老闆Joe對此話題沉吟片刻道：「會有擔心，始終唔只我哋兩個（老闆），仲要顧及其他partner同小朋友。」女兒今年3歲，原本愛吃迴轉壽司，如今黃藍不相往來，惟有告別壽司列車，將來也可能要告別香港。「我喺香港土生土長，好唔想離開，但香港已經變咗。我哋工作都係為下一代，現時儲定錢，希望帶佢去自由嘅樂土。」說罷，媽媽的眼眶有點紅。
婚紗店老闆Carmen則貫徹低調務實作風，「每個人都有言論自由，有自己諗法寫出嚟亦好自然，我唔介意表達立場，但唔會用嚟做宣傳。一間舖頭要長遠經營，唔係同客人政治立場一樣就得，客人係真金白銀買你嘅產品同服務，保持好自己質素，對自己生意，或對黃色經濟圈嘅持續發展先係最重要。」
花藝師曾被朋友unfriend
另外亦有花藝師不介意被圈成黃店。業餘花藝師Janice在三年前斥資30萬成立花藝佈置品牌Never Ending Story，原本是做熟客生意的小店，去年因出post成名。「721通宵睇直播，嬲到成晚冇瞓，第二日出咗個post話唔再接警察生意，當晚就有朋友話unfriend我，但同時我fb多咗幾百個like，連不相識嘅潘小濤、陳海琪都轉發，我個小店page本來得400幾個like，幾日內變咗8,000幾個。」
惟社會運動加上疫情，婚宴紛紛延期或取消，Janice變陣開辦花藝工作坊，「最近兩次開班都full。」Janice相信有危自有機，汰弱留強下，能夠留在市場的小店有一定質素。