「心情好複雜，由搭車到機場」，19歲女生黑仔（化名）深呼吸了一口氣，「由屋企開始慢慢睇，影住屋企附近周圍的相。我喺度諗，今次係最後一次喺呢個地方，真係要走了」。別了戰場別了家，通往機場的路上，紅夕陽為她送行。
在台北的頭兩個月，她四處尋宿，「每日睇邊度平就住邊，日日拖住行李周圍走，好似水貨客」，「每一日沒有靈魂地活着」。
「有時就係腎上腺素飆升，催淚彈『砰』一聲，咦？點解我去咗最前面嘅？」黑仔性格有點率性儍氣，說話總忍不住咯咯大笑。去年她在戰場驍勇，在立法會留守到最後，把催淚彈、海綿彈都吃了遍，「如果可以贏，以前有啲偏激嘅諗法，純粹係想像……要我綁住炸彈行入邊度都好，我真係OK」。
「（開戰時）真係唔覺得痛，中大喺校外打返入校內，中咗彈，完全唔知道痛，會focus喺當時要做嘅嘢。一入到二號橋坐低，嘩！嗰種痛即刻湧出來」。在理大，最初三日氣氛緊張，忙於隨時開戰，「無沖涼、無食嘢、無瞓覺」；「到後來大家開始留守，我終於沖咗第一次涼，發現啲水全部紅色。因為無處理傷口，繼續打，洗出嚟嘅水都係乾咗嘅血」。
烈焰是戰場，回到家又是另一戰場。「以前性格好樂觀，咩事都同家人分享，同媽媽最親，好鍾意喺屋企、好『毒』」；到後來「煲底是我家」，「有一段時間喺煲底佔領，成日瞓過夜，唔返屋企，佢哋已經好大怨言。掟晒嘢、『死暴徒』咁樣，有次激到要報警拉我。」黑仔後期更離家出走，連在理大被困、最終無法甩身也不多說。12月眼看着telegram瘋傳理大示威者一個個被捕，帶幾套衫、學歷文件便匆忙赴台。
頭兩個月，黑仔換過八間青年旅舍。住的是共用房間，一小格床，「四面木，加一塊簾，格局好似棺材」。除了吃飯等基本需要，每天23小時呆坐四面牆。打開fb，「睇住朋友喺彌敦道食魚蛋，幫襯黃店，而我就喺台灣」。閉上眼休息，腦海閃過戰場上的畫面，一直到天亮。在難過的時候，黑仔甚至曾經自殘，「無辦法抒發到，但咁樣做cover咗我精神上嘅不適」。
想念家的味道
冬季像懲罰她一般，安排最熱鬧的節日接踵而至。農曆新年，她在旅舍的共享空間裏，買了一盒炸雞當慶祝，孤燈瘦影。「諗緊屋企人應該好開心食緊團年飯，以前喺屋企過時過節，今年第一次自己過、自己倒數、自己過新年，跟住生日都會自己過。」父母雖有手機號碼，但幾乎從不過問。
「我始終都覺得屋企係香港，就算發夢，我都永遠出現喺香港，唔係台灣。發嘅夢、所有social media都關香港事，我只不過係肉體喺台灣，靈魂喺香港。」2月中，黑仔才找到固定居所，現也準備9月入讀大學，但內心深感無處是家，也笑言未認命扎根台灣。每當掛念香港的味道，她會特意尋找港式茶記茶樓，吃着不在香港的點心，找一份熟悉的感覺。
要回香港嗎？「每日內心都打緊仗」。若有日能重返香港，她最想做的事是「返屋企」，想吃媽媽的番茄炒蛋。但說到要修補關係，她笑言自己「硬頸」，難踏出主動一步，「唔想讓步，好似主動搵佢，就等於我錯晒咁。」
來台越久，越掛念住家飯。以前只煮公仔麵的少女開始嘗試下廚，見YouTube教煮番茄蛋花湯，她興致一起加點雞肉，結果就吃到肚屙。出事位在哪？是粉紅色的雞肉！又看黑仔如何完美解釋：「啲番茄紅色，咁咪染到嚿雞粉粉地色囉，唔知咩事就食咗，第一次煮雞肉就GG（完蛋）！」她又努力強調，廚藝比起以前「絕對有極大嘅進步」，「向前行緊，我努力緊㗎！我掌握咗好多整蛋方法，有炒蛋、煎蛋、焗蛋……」