西甲巴塞隆拿周一宣佈，2018年加盟嘅巴西小將艾法美路，以7,200萬歐元 (約6.2億港元）正式轉投意甲祖雲達斯，另加1,000萬浮動條款，隨後祖記就公佈波斯尼亞中場比真歷（圖）以6,000萬歐元身價加盟巴塞，另加500萬浮動條款。美路同祖記簽約五年，估計佢嘅年薪大約500萬歐元，而比真歷就同巴塞簽約四年。受到武肺所害，巴塞同祖記喺2019/20年度嘅財政報告肯定都會錄得嚴重虧損，但呢兩單交易趕喺6月30日前完成，部份進賬將會計算喺今個財政年度內，好明顯係為咗「造靚盤數」，可以輕鬆通過財政公平競技條例嘅審查。另外，祖記宣佈同兩老保方同基亞連尼續約一年。