近排大台紅星一個一個走，就算留喺度嗰啲，都唔知係唔係嫌人工低，唔多願出嚟做嘢，一時又話生仔，一時又話搞生意，連埋佢哋要打壓政治立場嗰啲藝人又冇得出嚟，搞到成個台好似冇人咁。
早排下晝睇返重播，見到套幾年前嘅穿越劇，感覺就恍如隔世。劇中主角「阿南」當年仲係新人，算係第一套孭飛，嗰陣就畀人彈到七彩，不過佢有觀眾緣，好快就順利過關補救返。
警告檢點啲
其實唔好以為拍電視就好好玩，同所有大公司一樣，電視台有好多人事鬥爭，亦都有好多大恰細。話說阿南剛擔正梗係好興奮，乜都加多兩錢力，碰正都係新人嘅對手「咖喱」，更加投入，對咖喱好好，而且咖喱人本身聰明，家底又好，所以特別多人錫。阿南同咖喱越拍越投契，但係拍攝尾聲，阿南竟然收到「棒球」嘅短訊，態度係擺到明叫阿南唔好爭女，話自己同咖喱情投意合，叫阿南行為檢點啲。
問題係阿南收到短訊時一頭霧水，一來自己同棒球唔熟，二來個內容好似冇乜禮貌，而且又點知佢哋係情侶關係，最奇怪係嗰陣咖喱只係剛剛識棒球，計落阿南自己同咖喱仲熟啲。
而棒球之後幾乎每日都傳一條短訊提醒，阿南收到嗰陣想鬧佢又唔係，同佢解釋又唔係，而且自己簽約冇耐年資尚淺，就費事得罪人，所以冇理棒球就算，而棒球最後奸計得逞，同咖喱喺埋一齊。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
