每當講起古思堯，市民一定記得佢帶住自製棺材去7.1升旗示威，今年已71歲嘅古思堯，近日確診直腸腺癌第四期，但佢堅持要喺今日上街抗惡法之後，先至排期入院，仲話如果連最基本嘅自由民主亦唔敢捍衞，將來生活只會更加痛苦，不過今年古思堯唔再用自製棺材抗議，而係整咗新道具。
新道具代替棺材
究竟新道具係乜？原來係一塊仿中國國旗，寫有「黑色恐怖、白色恐怖、法西斯恐怖」字眼嘅五星紅旗及刀形示威道具，古思堯話佢今日下午上街反完港版國安法之後先會入院。點解要堅持上街反惡法之後先肯入醫院？佢哽咽話：「因為自從我參加社會運動，我已經有咗決心，人只有幾十年嘅光景，所以值得做嘅，一定要做，應該做嘅，就一定要做，如果你唔做嘅，一錯過機會就唔得。」仲話患癌前已決定，只要香港、中國大陸有惡法出現，佢都一定會故意違反咁話。
佢又話6月29日收到內地國安來電，問佢會唔會抬棺材示威，佢話由於中聯辦多次用黑幫搶走佢示威棺材同花圈，所以會帶「鏹水」遊行，再遇強搶道具就用鏹水還擊，點知即晚就收到中區和西區警民關係科警員電話，又咁啱提佢千祈唔好帶鏹水示威，否則可能未示威已被捕，但就答應7.1升旗示威期間，盡量安排軍裝警員維持秩序，防止有人搶走佢嘅道具棺材。
李八方