恩沙基（圖）周一帶領意乙賓尼雲圖提前七輪升班，下季將再次有機會同細佬、拉素教練施蒙尼恩沙基喺意甲交手。曾經效力AC米蘭同祖雲達斯嘅意大利名宿恩沙基，今季出任賓尼雲圖教練相當威威，一路贏到開巷，周一主場1:0小勝祖雲施達比亞後，喺意乙榜首拋離第2同第3位球隊足足24分，提早七輪封王兼升班，追平1977/78球季提早7輪確定升班嘅阿斯科利紀錄。