國安法殺到，香港人更要識得be water，有班義務團隊，見近期關於立法會初選氣氛開始炒熱，為咗令大家可以更加容易掌握資訊同形勢，於是決定重操舊業，推出網上專頁，將初選候選人資料整合。
民動眾籌未達標
Vote4.hk團隊喺上年區議會選舉發揮唔少作用，為公民社會提供投票指南，等大家眼花繚亂之餘唔會投錯票。區選結束後，武漢肺炎爆發，眼見網上對疫情嘅資訊不足，團隊又成立「武漢肺炎民間資訊」網站，提供疫情追蹤、黑店名單、急症等候、自保貼士等，畀市民可以一目了然。
近日初選正式啟動，團隊話眼見每日睇新聞成幾百件事、幾百個人名，搞到亂晒大龍，怕大家追唔切選舉，所以決定推出立法會選舉初選專頁，為大家提供每日更新嘅選區形勢、候選人資料等，大家可以跟貼每項選舉資訊，團隊同時公開招募義工編輯，實行人多好辦事。講開民主派初選，其實仲有唔夠兩周就舉行，但家陣仲有好多事未齊備，例如大會仲收集緊智能電話同平板電腦，而民動發起嘅眾籌目標係350萬，但至今三成不夠，追求民主係難事，真係要大家有錢出錢有力出力先得！