般尼（圖）周一憑第300次為球隊喺聯賽上陣嘅隊長賓美下半場一箭定江山，作客1:0擊敗水晶宮，喺英超升上第八位。般尼作客水晶宮上半場打成均勢，換邊後就以水晶宮較強勢，但喺62分鐘，賓美接應罰球喺禁區內插水式頂入，取得佢2017年1月以嚟第1個入球，助般尼贏1:0。2連勝嘅般尼以32戰得45分升上聯賽榜第8位，仲有機會爭來季歐洲賽事參賽資格。