国安法硬𡁻香港人，是為了令香港二次回歸？珠姐，忍吓口，留返七月十四先講，好冇。
中央出手（全版廣告係用呢四隻字），梅開二度，即係，97年第一次回歸，唔掂。
這個第二次，萬一又瀨嘢，即係，將有三次回歸、四次回歸……甚至七次！到時，應該叫做回魂！
除非珠姐講嘅二次，是二廁，豪宅格局必備的二廁，冇殼冇車的年輕人超欽羨啊。一直霸住茅坑的老海鮮被告之要移歪，方便一下衝得好急的年輕人。二廁回歸，雙桶出海，廁板獨有免擦暖風，香港人23年營營役役，無非為了三餐一坨，既然保就業有了，珠海那個叫做垃圾尾島的桂山島，益香港人喎，會借畀港府起公屋，解決年輕人居住問題咁話。公屋都搞二廁，買大開大，以和為貴，掂！
一命二運三風水，倡議每年都搞x次回歸，與扒龍舟搶包山一併列作非人類物質遺產，回歸x次就派x萬蚊。2020二次回歸派一萬，2046年27次回歸塞27萬入你袋，唔係湯師爺的cheap版波板糖，實掂！愛黨愛習帝的千次回歸聯署，現正低調展開，八大校長與柒大宗教領袖行穩致遠，率先用殘體字預簽好未來一個甲子的聯署。回歸塵土仍死後留名，校長、道長與教牧叮囑移居國外已大量繁衍的子孫們，記得只要日曆還有七一，返來香港，拎錢兼拜山！