香港揚威海外？呢兩日黨報喉舌不斷發放同一消息，話內地紀錄片導演金華青拍攝一套紀錄「黑暴」嘅電影《香港，請再次閃耀》喺第七屆希臘耶拉派特拉國際紀錄片電影節，拎到「最佳外語短片獎」，仲話獲得電影節組委會「高度評價」咁話。孤陋寡聞嘅八方即管去睇吓個電影節，發現幾個靈異位。
疑央視短片重新剪接
首先係電影節根本未舉行，據官網顯示，第七屆耶拉派特拉國際紀錄片電影節今年8月先舉行。何以未頒獎先拎獎？八方再睇睇今屆同上屆嘅獎項名單，都搵唔到「最佳外語短片獎」，神秘程度直頭拍得住國安法。
不過西方勢力透明度係高啲，八方終於搵到今個月20號，官方有一則新聞公告，話因應武漢肺炎疫情，電影節舉行線上放映會，而《香港，請再次閃耀》准許大會免費放映，於是官方頒發出一張「特別嘉許狀」，張圖就係官媒吹捧嘅「最佳外語短片獎」。厲害了，我的國。
原來係免費放映，八方當然要去欣賞吓，發現內容同埋鏡頭畫面同央視上個月全國播放嘅《另一個香港》，幾乎有七、八成相似，睇得出部份鏡頭嚟自同一母帶，只係剪接稍有分別，內容都係抹黑污衊示威者。
同一條片剪十次，咪可以量產十部紀錄片？八方唔想洩露國家機密，都係少講為妙。
李八方