美國勝在有民主精神，總統掌握大權，也不能一人說了算；特朗普入主白宮後，鍾意使用權力，不時簽署行政命令，目無餘子，好過癮，但佢最希望做到習近平、普京、金正恩咁樣，一人說了算，冇人民夠膽阿吱阿咗，不知敬畏。
習普金三人金口一開，全國聽從。邊度會好似美國咁，有不少不知好歹嘅公司與人物，公然批評總統特朗普呢樣唔啱，嗰樣唔掂㗎。特朗普命令軍隊鎮壓示威，還未出動啫，國防部長及軍事將領已經公然反對，總統出張帖文鬧人，Twitter膽敢刪除，私底下請習近平幫忙買多啲美國農產品，好等佢贏得大選，直情係國家機密啦，點知近身大員，國家安全顧問博爾頓竟敢出書爆佢內幕，博爾頓若是俄羅斯、中國人、北韓人，早就被秘密囚禁或者身亡啦，點可以出書賺巨額稿費！
美國人如此大膽，愛金錢及言論自由多過敬畏總統，皆因佢地清楚知道美國憲法保護言論自由、出版自由，總統不能違背。中國憲法夠有各種各類自由寫到明啦，點解中國人全是順民，唔夠膽批評領導人半句？這就涉及司法獨立。中國係黨政不分嘅體制國度，行黨大於法嘅制度，係司法機關受黨委領導制度，中國人民一批評執政黨與英明的黨主席，就無法律保護，任政府控告，難以甩身，必定坐牢。中國憲法是受中國共產黨黨委書記操控，有法等於冇法，中國憲法係擺響度畀外國外交官睇吓嘅啫。
習近平可以出半句聲就令一部書消失，特朗普唔喜歡博爾頓，要禁止出版必須走上法庭，法庭雖然認為博爾頓可能洩漏機密，但基於憲法保障言論自由，仍然判特朗普敗訴，特朗普姪女亦出書爆家庭內幕，令特朗普極難堪，上庭申請禁制令，一樣敗訴。美國司法界可獨立運作，法官可獨立判斷不受權力政治影響，是故美國人，美國企業敢於對特朗普對抗，就係因為美國行政機關難以影響或操控法庭判決！美國有國安法，香港也快有港區國安法，問題不在「全世界都有國安法」，真正核心問題係有咗國安法之後，香港是否仍然可以維持司法獨立，不受行政機關及西環不停「指導」，及令法官難為或甚至知情識趣，另謀高就！