國安法殺到，7.1後香港吉凶難料，肯定嘅係白色恐怖正在蔓延。八方噚日聽聞再多一個政治人物宣佈退出社運，到底係邊個？答案係人稱國師嘅陳雲。噚日佢喺facebook公佈消息，表示今後會繼續學術研究，偶爾寫吓書。
講起陳雲，一定聯想到國師用篋做盾、一夫當關嘅雄姿。昔日勇武嘅國師，因乜事言退？又係咪同國安法有關？佢喺帖文冇交代，但批評泛民同港獨，將香港推入國際政治鬥爭黑洞，國師有感香港大部份人都唔需要佢嘅社運理論指導，決定要落船。有網民形容咁樣唔係落船，係「花式跳船」，仲發現陳雲其實2016年出過類似帖文話要告退，網上嘅佢仲會逐漸消失㖭。前排一副難求嘅「反獨反奸通緝令」啤牌，陳雲被列為「紅心dee」，罪名係「分裂國家」，國粉關注國師動向，有人問佢會唔會寫色慾小說，國師爽快話「當然會」，大家即管期待吓，如果新作遲遲未見，記得掟西瓜尋人。