話說「OMDB」唔係咩英國授勳名銜，而係「over my dead body」簡寫，近年成為大家揶揄公民黨黨魁楊岳橋（AY）嘅用字。2016年AY講咗句如果有人想搞香港司法系統就要over my dead body，幾年嚟俾人瘋狂抽水，就算佢認衰都無補於事。OMDB已經淪為笑話，但建制派一於少理，民建聯周浩鼎噚日就喺港台節目《香港家書》嚟個東施效顰。
轟大律師公會聲明「錯誤」
曾經鬧出執業律師資格疑團嘅周浩鼎，喺《香港家書》炮轟大律師公會日前個公開聲明，係「絕對錯誤」同「有誤導性」，又批評大律師公會「政治立場先行」，仲翻埋當年高鐵一地兩檢舊賬，諷刺公會提供「所謂專業但錯誤的意見」。可能周浩鼎太善忘，唔記得如果冇人大常委夾硬出手，唔只一地兩檢，連成條高鐵都係dead body！
周浩鼎之後繼續鬧，話香港過去一年有「殘酷」、「毫無道德」嘅「極端分子」亂港，仲叫社會各界要用盡方法對抗，說穿了原來係叫人支持港版國安法，話可以拯救香港，最後佢用AY名句作結，揚言如果有「極端分子」意圖摧毀「一國兩制」達到港獨目的，必須先「over my dead body」，示範咩叫「把自己看得太重要」。不過，周浩鼎輸咗區選，9月立會選舉難保唔會再輸，咁到時佢甚麼也不是，仲叫人OMDB又有咩意義先？
李八方