【堅守信念】去年6.12遭警員槍傷右眼的女拔通識男教師楊子俊，本月中宣佈不獲校方續約，並提早7月離職暫別教育界。楊Sir說，面對荒謬不可習慣，但面對身體上的痛、累及家人的痛、與學生離別的痛，則無法不習慣，「雖然我哋成日話唔好習慣呢啲嘢，但現實係當你接受到咁多嘅痛楚，咁多嘅滋擾時，你會慢慢覺得呢啲係我必須要付嘅代價」。
本月18日，楊Sir在facebook專頁宣佈，女拔決定取消下學年中三通識科，他來年不獲校方續約。右眼失明令他工作能力大減，不大可能獲其他學校聘用，預料須暫別校園。事隔一周，工作機會卻接踵而來，不僅來自補習界、保險界，還有教育界，「真係有學校肯請我做一個通識老師，亦都講明學校領導層明白我嘅狀況，（但仍）係願意咁做」。
面對送上門的教席，楊Sir最終還是婉拒。他已決意投身這場運動，加上目前身體狀況，以及教育環境也不符當初預期。他此刻寧願在體制外貢獻社會，也不願回去校園中苟且偷生，「我𠵱家睇到嘅問題係︰點解我會俾人趕出嚟先？你當係政治操作又好，學校唔重視通識科都好，其實係緣於香港社會嘅政治問題」。
搬屋避騷擾 仍被按門鐘
「如果你喺6.12嗰朝同我講︰『喂你今日出去會冇咗隻眼喎』，唔好講話冇咗隻眼喇，你可能會俾催淚彈打中嘅話，我都未必會出去，自己都係怕痛，都會怕身體受到傷害」。由一年前在夏愨道上失去右眼開始，痛苦總與楊Sir伴隨。他被起底，大量恐嚇訊息傳來他與家人同住的單位，即使現在搬了屋也似乎避不開。上星期有人按新單位的門鐘後突然離去，像是警告他「我們知道你在這裏」。
楊Sir代表律師在早已警告過他，曝光率越高，帶來的威脅越大，但他每次受訪都有得着，「每次訪談都好似強迫自己整理心中的答案，當年輕人都走上街頭與警察搏鬥，會流血被捕，我呢啲坐喺鏡頭前同傳媒講嘢，算得啲乜？」活躍於鏡頭前亦令他感受到社會上仍有不少同路人，正如抗爭者梁繼平所言，「香港人身份是靠痛苦連結」。
記者問他，離開校園與右眼失明，那樣對他而言較「痛」？楊Sir說，由中彈開始，已預計要離開校園，學期開始起已減少與學生交流，將別離的痛苦減至最低。停課期間，他收到學生的匿名短訊，至今仍耿耿於懷，「佢話覺得我今年變咗，即係覺得我好似上年好有熱誠，唔只喺教學方面關注我哋，仲關注埋我哋個人情況。但今年就好似變得好似完全唔係好點理佢哋咁，講到我好似變咗心咁樣，好似唔係當初嘅自己，希望我搵返初衷。」
出書勉勵同行持守專業
他因此反思過去一年有否辜負教師天職，但既然選擇走這條路，只好接受無法與同學好好道別的結局，「今年要斬斷一切呢啲關係，對於一個未必重返教育界嘅老師嚟講，個結局唔係咁理想」。
人不可習慣荒謬，但面對種種痛苦，楊Sir笑言他無法不習慣，「雖然我哋成日話唔好習慣呢啲嘢，但現實係當你接受到咁多嘅痛楚，咁多嘅滋擾時，你會慢慢覺得呢啲係我必須要付嘅代價。如果你能夠接受佢嘅話，先可以有下一步行動」。
告別校園後，楊Sir的首個大計是8月出版暫名為《逆權教師》的新書。楊Sir笑言，原先預計該書是在65歲退休後才問世，沒料到30歲便要動筆。該書結集了他過去八年在教育界內掙扎浮沉的經歷，冀藉此書勉勵教育界繼續在制度內持守專業與良知，也希望普羅市民看到現時香港教育制度的問題。
港版國安法來勢洶洶，楊Sir最近正協助出版另一本抗爭題材的書籍，惟原先合作的印刷商突然拒絕印書，幾經轉折方能找到另一印刷商。在國安法陰霾下，他體諒印刷商擔心秋後算賬而請他食閉門羹。
若他出版的書最終被指違反國安法，他亦甘於成為案例，讓大家知道國安法何等荒謬，告訴國際社會惡法如何違背港人核心價值，「咁如果國安法一啲好唔合理嘅條文、細節，令到我本書突然違法，令到我要冒上法律風險，我係會承受，因為呢個都係抗爭運動嘅一部份。我哋做嘅方式唔係要迴避佢，唔係嘗試唔做任何嘢去保護自己，而係應該唔同方法去嘗試衝擊呢個制度」。