負面新聞多籮籮的李姓撐警正義藍絲，這天又再見報，主旨竟然是血淋淋的家暴：凌晨三點幾，路經元朗八鄉的一架私家車上有人吵大鑊，停車後激動的廿六歲青年涉嫌動武，電光石火間一對中年夫婦受傷，途人見狀致電報警，原來掛彩的是李藍絲和她現任丈夫，郁手的是她與前夫所生兒子。類似的家庭倫理悲劇大概並不罕見，如果發生在私人空間，極可能大事化小小事化無，流血再多，自行包紮傷口搞掂，話曬都係社會知名人士，應該不想家醜外揚，可惜好衰唔衰發生在大庭廣眾，網民聞訊紛紛拍手稱快，養尊處優的小鳳姐只好又被驚動了。自從七二一白衣暴徒無差別恐襲事件，大家都對元朗警隊的應召速度產生疑問，這次一洗頹風火速到場逮捕疑犯，不知是否因為制服有「風林火山」貼紙，執行任務特別醒神？
不過從另一角度看，真令人戥佢哋驚。記憶尚未完全退化的你，不會不記得李藍絲對警隊照顧無微不至，曾經一次過攜帶四千個橙到警署打氣，另外又餽贈一萬盒檸檬茶和紀念牌，這回獲得一般市民可望不可即的妥善服務，其實有沒有賄賂嫌疑？主張息事寧人的維穩派會話，橙箒，幾唔閒吖，平時去醫院探病，都係咁意帶兩個㗎啦，又冇同時加送「杏」，有乜所謂唧？啱，冇講錯，但出手闊綽的李某唔係送兩個，唔係送二十個，甚至唔係送二百個噃，大拿拿四千呀老友，你唔覺得牽涉利益輸送咩？反而那一萬盒檸檬茶，倒又不至於構成罪狀──消息靈通人士報料，指該次慰勞熱面貼上冷屁股，檸檬茶不合警員胃口，收下後轉頭就丟落垃圾桶喎。