林師傑很愛玩《狼人殺》，他在YouTube也拍了多條狼殺影片。狼隊與好人的對決，好人成功找出狼人，遊戲結束，好人獲勝。
遊戲貼近人生，更像他在無綫的處境。最近有說因為老婆歐陽巧瑩的政治表態，牽連林師傑也被提前解約，活生生一個「狼人宮廷版」。
入行11年，林師傑當然不算出類拔萃，但活在宮廷圍牆內，不代表不可以有自己聲音。今天他說：「大家如果可以畀五秒鐘，唔好覺得林師傑係一個好寸、好自視過高嘅人，容許我講半句，喺呢間公司入面……我真係盡咗力！」
終極告白，不用等18年。「我算係敗咗畀一個制度，但係我見到好多香港年輕人，仲係好大膽嘅時候，我覺得好inspire！」
遊戲結束，好人獲勝！但願如此。
我諗唔到有留低原因
原本，林師傑是無綫的「親生仔」，亦即經理人合約，不過，今年卻忽然收到通知要改合約，變為「六騷制」，「佢哋想我轉一份約轉六騷（一年六騷），傾咗每個騷乜嘢價錢之後，我一見到個數字都知道冇可能維到生計啦！（低成點？）萬二蚊一年囉，六騷！呢個就係公司承諾畀到我嘅……難囉，我真係維持唔到生活，我諗唔到有留低嘅原因！」
被通知轉合約當刻，林師傑的反應是傷心多過嬲，「我11年前立志做歌手，一路等機會，一路增值自己，慶幸大家仲記得我係『木偶哥』啦，我從來都冇做過一線二線三線，大家都睇到，林師傑，由『木偶哥』之後就係做一個主持，做一個《勁歌金曲》主持、做一個《Music Café》主持，去到《Music Café》個騷冇咗，淨係做一個《勁歌》主持！」
《超級巨聲》出身只想唱歌出碟，卻去了做主持。林師傑說，入行11年，總覺得自己是個奇怪的人，在無綫，他更覺得自己像個局外人。「我做主持我會唔開心，我唔開心唔係因為我冇份唱，或者係我未有機會，當然係會有一個壓力，你會不斷評估係咪我唔夠好呢？所以冇呢個機會呢？我做主持好確實地見到個人喺我面前『咪嘴』（夾口形）plug緊歌……去到2020年，仲覺得需要plug《似水流年》？我唔知呀……翻唱歌，冇問題㗎，但係有做法嘅分別囉！」
活在大台的深宮，山頭處處，政治多陷阱更多。最荒誕離奇的事情，都發生過在林師傑身上。有一次，他收到一個助導電話，叫他去拍一場槍戰演個槍手，去到現場才發現與老臨沒有分別，「佢話係大場面，監製覺得你點點點，我就接咗通告，去到俾人射！武指見到我話，你做乜做呢啲呀？你返去唱歌仲舒服啦！開大咪（大聲公）喎！卒之連shot都冇cut到出嚟呀！」
隨之而來的連鎖反應，是被高層開會公審，「我真係俾人指名道姓，林師傑你唔可以亂接嘢，接啲垃圾角色會影響自己！我兩邊不是人，我俾人鬧，係因為我接唔啱個角色，咁幾大（角色）先啱我接呀？幾細先啱我接呀？返去開會仲要俾你哋砌我唔識接嘢，我就覺得有少少誇張囉！」開工都有罪。
我只想盡快修復返
最近，林師傑說，決定離巢後開始聽到很多閒言，「話我耍大牌，臨離巢就話我唔肯去演劇。我啱啱先俾網民讚完（《十八年後的終極告白》），我會唔會喺呢個時候唔想演劇呀？」
想當年，有說林師傑得以飾演「木偶哥」一角，全靠林媽媽與無綫高層曾勵珍是好姊妹，他才有此機會。林師傑的父母早年也是藝員，兩人是無綫第11期藝員訓練班成員，林父林道權好早已轉戰商界，而林母韓珍則做過《婦女新姿》主持。原來是個美麗的誤會。林媽媽同珍姐互不認識，「係唔認識，如果同珍姐friend，我點都上到三線啦，一年唔使開得一套劇做side cast，側邊全部都唔係managment嘅artist啦！加入咗《愛．回家》，係珍姐見到我，我80集之後先有戲呀，係因為觀眾鍾意我先至多咗戲份！」
另一個美麗的誤會是，林師傑一直被說成是「有錢仔」。西班牙出世，3歲移民新加坡，6歲回流，16歲到美國升學再到新加坡服兵役，當兵兩年後到澳洲讀大學，「我不嬲都唔係有錢仔，我諗呢個係大家對我有好大誤解！我拍《不再說謊》同《小天使的話》MV嘅時候，我係一個人秤住四套衫同一支結他，自己行上去location拍MV，我有錢就請工人啦！」
問起父母對他離開無綫的決定是否支持，林師傑停頓良久不懂回答，之後才說與父母關係起了巨變，「真係人生，我成個life，我哋三個人嘅life有巨變囉！講得簡單啲就係變差咗……我阿媽最低潮嘅時候，有Tammy（歐陽巧瑩）喺佢身邊陪，我諗佢應該記得好清楚，當其時日日有兩個人喺佢身邊，一個係佢個仔、一個係歐陽巧瑩！（父母關係有變？）好難講，屋企人始終好複雜，親情係冇得計數，只可以講個恩怨係好深，我好想快啲完，我好想快啲開心番！所有唔好嘅relationship，我只想可以盡快修復返，人生太短喇！」
此時，一直坐在旁邊看着老公訪問的歐陽巧瑩，說了一句，「我諗呢一年嚟，全香港嘅家庭好多都有呢啲處境要處理！」聯想題來了，早前討論區就曾出現林師傑父親是親中撐警藍絲的帖子。問林師傑，是否政見問題，他說：「好多事情……我諗經歷咗呢一年之後，大家都好難再咁具體去分得清，乜嘢叫政治、乜嘢叫朋友、乜嘢叫工作。我覺得就咁標榜其中一part令到關係變，會有啲唔公平！我諗呢一年大家都feel到，其實人生係突然之間可以連成一線，然後一搥窩落嚟，你會好痛囉！」
歐陽巧瑩一定為我好
不想多談父母關係，但有一樣是肯定的，就是林師傑兩公婆都黃到金。林師傑說：「我好撐年輕人，我覺得香港年輕人畀咗好大動力我，我33歲，真係make一個decision去試吓用自己方法做一次，做自己認為啱嘅事，我覺得功勞係有喺度，係有被inspired到囉，我又被身邊嘅人inspired到，搵自己把聲、搵自己喺社會嘅定位，搵自己人生應該perform啲乜嘢！」
去年10月，林師傑在社交媒體po了和太太歐陽巧瑩的咀嘴婚照，寫下了數句說話，「呢期壓力好大，哈哈瘦咗21磅，兩個人一條命。我哋一定過到。我愛你。」林師傑今天說，其實這一關仍未過，「呢一關仲過緊，其實壓力一直都冇乜點樣細過，認真㗎，因為我一直知道自己個ability係寫歌，而我一路都冇得將呢樣嘢變成我部份嘅收入來源，我已經好大壓力！即係當我有聲用唔到嘅時候，其實呢一個壓力大過晒我所有壓力！」
林師傑和歐陽巧瑩在2015年拍拖，拍拖三年後結婚，林師傑說兩人共同經歷了很多難關，「我覺得我人生最清晰嗰樣嘢就係，歐陽巧瑩一定係為我好囉，佢從來都冇question過我，究竟我係咪有問題，佢係唯一一個從來都唔會咁樣question我嘅人，佢好願意同我live喺嗰個moment，因為佢好清晰！」
回望在無綫的11年，林師傑說：「話我同傳媒關係唔好喎，因為我出過唔好嘅新聞，覺得我應該要洗底，真係洗足11年㗎！我由day 1第一日入TVB，人哋已經話我要洗底，洗到結完婚，洗到真係冇嘢，洗到淨係做《勁歌金曲》主持！我太介意人哋點睇我，雖然話我𠵱家可以暢所欲言，但呢11年嚟我嘅日子真係唔易過，日日都俾人懷疑緊抨擊緊，當我突然間可以有自己把聲嘅時候，我都要諗一諗，究竟我把聲要點樣用，我想講啲乜嘢！我最想講嘅係，我真係有好努力去活我嘅人生，亦都有好努力去為我嘅家人囉！」
離開無綫終於自由了，未來的路人生漫漫，林師傑承認有經濟壓力。他說：「但係我覺得喺香港，你努力餓唔死人嘅，好多嘢都會做到！其實我好希望可以同老婆過一個好豐盛嘅人生，呢個係我最希望嘅事，我希望可以同佢去建立一個我哋好鍾意嘅lifestyle，做我哋最想做嘅嘢，影響到我哋想影響到嘅人！」
但願好人一生平安。
【後記】狼人殺
說回《狼人殺》，問林師傑最叻擔當甚麼角色，「我做得好屎呀，唔夠膽講，我哋呢一班人玩得好開心，因為大家都會竭盡所能去呃大家，點樣可以喺人哋最微細嘅bug放到最大，然後希望你啲隊友可以一齊幫你煲大一樣嘢；同埋真係盤雙邊邏輯囉，唔好淨係睇你認為嘅好人講緊乜嘢，要聽埋唔鍾意你嘅人講乜嘢！」
狼殺如人生，贏輸都不重要，林師傑說：「最緊要好玩，同人生一樣，因為輸贏好簡單，你做狼，你做四隻隱狼，贏咗，係冇意思！你做一個好人，你冇可能喺《狼人殺》入面，喂，我係好人呀，你要信我！我哋每一晚狼隊都會殺一個人，每一日都要投走一個人，如果你幫唔到個community，你喺呢個community搵唔到自己嘅聲音，你就係要被淘汰囉！雖然好殘酷，但係都可以好開心，同人生好似，又要好小心自己講乜嘢喎！」
再瀟灑啲，直接離場唔玩！
場地提供：悉尼樂園