德乙煞科戰，排第四嘅漢堡如想得到升班附加賽資格，要靠已奪冠嘅比勒費爾德（圖）「幫手」，最少摸和第三嘅海登咸。德媒發現，如比軍放水畀海登咸升班，來季多賺200萬歐元轉播費。德甲轉播分成係睇球隊近五季綜合戰績，如史特加同漢堡升班，比軍嘅綜合戰績係全德甲最低，分成最少；相反海登咸升班會變包尾，比軍跳升一級多賺200萬歐元。