林作與裕美戀情曝光至今近一星期，裕美曾被爆與黃子恆發展婚外情，後來離婚收場，而林作前度則是十優港姐麥明詩，網民熱烈討論林媽媽會否接受裕美做新抱。昨日林作和媽媽Lily在麥當勞道豪宅接受《蘋果》獨家訪問，Lily在訪問中斬釘截鐵說：「暫時呢一刻冇商量餘地！」
知失婚唔舒服
記者打趣問如果林作和裕美若有小朋友讓她抱孫，會否較易接受？Lily堅決落閘說：「咁佢過佢㗎喇，我自己過我自己，從此母子關係呢……」然後用手做了一刀切動作。林作即說：「咁寸？咁我都唔會生細路仔嘅，𠵱家最緊要係事業行先。」Lily亦認同：「𠵱家佢做保險先啱啱起步，做男人梗係事業為重。」
林作透露和裕美拍拖近一年，其間有帶女友見家長，不過他揶揄媽媽性格樂觀，對不接受的事物當看不見，Lily說：「係呀，唔接受咪當睇唔到，當係幻覺囉！直至佢哋拖手我先醒。」對於林作指她歧視失婚女人，Lily亦很坦白：「一聽失過婚，雖然時間好短，但個心點都係唔舒服。」林作反擊指：「你都失過婚啦！」Lily說：「我失婚係因為你老竇出軌，所以你唔好學你老竇，亦唔好咁輕易結婚，好似我咁，當時就係衝動結婚、生仔同離婚，唔好行呢三步。」此時林作爆seed說：「阿媽要我接受最上等教育，就係想個仔帶唔同嘅文化觀、價值觀返嚟，學費咁貴，究竟係讀屎片定係學到少少嘢返嚟，我覺得應該係後者，作為一個男人，呢點要堅持，我唔係唔孝順，只係大家睇法唔同，好多阿嬋都係睇唔開嘅！」
同前度反差大
提到林作日前已經送戒指求婚，Lily未答，林作已搶先說：「求婚？冇呢個意思喎，前任我都有送啦。」Lily此時勸阿仔：「所以以後唔好亂送戒指畀人！其實唔一定要搵有錢女，只係唔想佢搵個咁多爭議嘅，新抱平凡啲，唔好畀到我咁大壓力。」林作插口說：「咁前度冇壓力？」Lily雙手一高一低比劃，說：「之前都有啲壓力，因為嗰個名氣太大，但一下就喺上面撻落嚟，你明㗎啦，反差大呀！」
裕美日前接受訪問時，在鏡頭前向林媽媽釋出善意，指若對方有不滿，她可以改善，Lily對着鏡頭向裕美說：「暫時仲未有必要大家面對面講，心情未靜落嚟。」對於媽媽和女友的「鴻溝」，林作將責任歸咎於自己：「坦白講，成件事去到咁，係因為自己成就唔大，否則啲人絕對唔得閒理我老母嘅睇法，你睇吓特朗普揀老婆，使唔使睇佢老母面色？」