武漢肺炎肆虐全球，社會上、各行各業也大受影響，不少人在隔離期間，也感受到親情可貴。張智霖（Chilam）與老婆袁詠儀（靚靚）、霍啟剛夫婦前日也趁着端午節假期，與子女共享天倫。Chilam與靚靚近年頻頻北上夫妻檔賺人仔，靚靚於4月去上海拍網劇，上月完成工作返港，前日是端午節，《蘋果》在淺水灣沙灘見到Chilam、靚靚與囝囝魔童一家三口總動員外出，三人均穿上T-shirt襯短褲與人字拖的假日裝束，兩公婆戴了黑超，他們在商場對面的街道泊車後，就行去沙灘方向。
海邊玩自拍
Chilam全程搭住囝囝膊頭好好傾，沒有理會靚靚，而靚靚心情興奮，邊行邊輕輕跳，相當有少女心。三人走到水邊，以為他們想去應節浸龍舟水，原來他們想一家三口自拍影合照，一家人相當好好傾，之後三人一同離開，見Chilam一路搭實魔童膊頭，兩仔爺糖黐豆般密密斟，未知是否天氣酷熱，魔童一手撥開Chilam，之後他們行回商場買凍飲，然後便駕車離開。
孻女臉圓圓
另外，霍啟剛與太太郭晶晶及6歲大仔霍中曦、3歲二女霍中妍及1歲半的孻女，一家五口也趁着端午節，搭纜車上山頂一日遊。晶晶負責用孭帶抱住罕有出鏡的孻女，雖然只有背面，但見到她頭髮濃密，臉珠圓圓，霍啟剛則主力照顧大仔及二女，上到山頂一家五口齊齊食pizza，霍啟剛留言：「今年端午節因為各種原因，好多龍舟比賽都要取消或者延期。冇得睇龍舟比賽，就全家搭纜車上山頂睇風景。香港真係好靚！」霍啟剛近月積極鋪路落區探訪，盛傳他參選9月的立法會選舉，競逐體育、演藝、文化及出版界功能組別，故不時在社交網出post。
