現年71歲的企業家兼袁彌明父親袁弓夷，一直支持香港抗爭運動，日前他親身到美國游說當地政界，望美國幫助香港抗爭者。有藍絲老婆容海恩的袁彌昌昨日接受商台節目訪問時，形容爸爸的行為是悲劇：「佢𠵱家咁嘅情況，都係屋企嘅悲劇，我預見我未必可以再喺香港見到佢。」袁弓夷坦言無得驚遭秋後算賬：「要保住香港，我哋就要有犧牲。」
袁弓夷是袁彌明及「希望聯盟」成員袁彌昌父親，過去一年都公開支持香港抗爭運動，日前他更親身到美國，游說美國政界，希望幫助香港抗爭者。其子袁彌昌昨日接受商台節目訪問，形容爸爸的行為是悲劇：「佢𠵱家咁嘅情況，都係屋企嘅悲劇，我預見我未必可以再喺香港見到佢。佢之前覺得國安法，唔會咁快殺到嚟。」他續道：「國安法或者疫情令中美力量消長，令佢做咗呢個，可能返唔到轉頭嘅決定，我作為佢個仔，我會尊重佢，不過係分析上我唔可以苟同佢。」
對於外界一直關注其家庭立場，袁彌昌形容自己的家庭是香港政治光譜的縮影，各人有不同立場，他指妹妹袁彌明搞抗爭，是因為她曾在電視台受到壓迫。他稱自己對政局有全盤考慮，其父則是商人，認為美國戰略全部有效及能即時生效，「佢見到商機，只要見到有正面嘅feedback就會去做」，他指自己：「我反而會參考更多意見，唔會咁輕率講呢啲說話。」
反駁子：大家唔同路線
袁弓夷本月中離港飛美國，先後到華盛頓會見眾議院共和黨議員佩里（Scott Perry）和美國共和黨眾議員約霍（Ted Yoho），袁彌明昨日在fb分享爸爸會見美國官員的照片。袁弓夷昨日回覆《蘋果》表示此次出行目的：「透過美國立法同司法機關，將中共定性為犯罪集團。」「港版國安法」有可能下周通過，美國參議院日前一致通過《香港自治法案》（Hong Kong Autonomy Act），呼籲制裁支持中國限制香港自治的人或公司，袁弓夷認為所有事情必須爭分奪秒進行，他留在美國會不停奔走，還會見了一些民運人士。
袁弓夷續說：「美國好多嘢要做，關鍵係返嚟香港要14日隔離，嗰14日唔可以香港做嘢，又唔可以美國做嘢，全部要靠晒電話做嘢，好多嘢要親身。」問到可擔心被指勾結外國勢力，若然稍後通過「港版國安法」，有可能遭秋後算賬？他續說：「我唔相信中共馬上嚴厲執行，不過都冇得驚，要保住香港，我哋就要有犧牲。佢執行都可能要到8月底，先拉去警署啲人，7月份未危險住。」提到袁彌昌在電台訪問中評論爸爸有做錯地方，袁弓夷坦言：「大家唔同路線，佢當然有嘢唔認同我。」他今次行程緊密，表示短期內未有回港歸期。
袁彌昌：唔贊成佢返嚟
對於爸爸有準備為香港犧牲，袁彌昌昨日接受《蘋果》電話訪問，他說：「我尊重佢嘅決定，但係我唔認同佢幫香港人決定要付出幾大代價，犧牲香港嘅前途。」不過問到他個人會否擔心父親的安危，他就答：「梗係擔心啦，我又擔心佢又擔心阿妹，都唔知下一次幾時會見到爹哋，佢好錫我啲女，𠵱家佢未定幾時返嚟，但係我哋屋企人為咗佢安全，都唔贊成佢返嚟，好無奈。」
此外，近日袁彌昌密密於港島落區做街站，並派單張介紹「誰是袁彌昌？」內裏有讀書時的照片，及與爸爸袁弓夷、妹妹袁彌明和大女的家庭照，但沒有太太容海恩。袁彌昌之後回應指：「佢始終仲係新民黨唔方便。」袁彌昌於商台訪問中再被問到當中原因，他透露有想過叫太太加入自己政黨，但現時仍未適合。