巴黎戲院重開已經接近一星期，香港朋友聽聞我仍然裹足不前，感到十分意外，他們認為戴上口罩坐在人流疏落的觀眾席兩粒鐘，中招風險接近零，不明白素來視電影院為另一個家的資深影迷為何如此驚青，不急起直追為「守生寡」的禁足時光補數。咦，法國人唔中意沖涼，不是國際共識嗎，處理個人衛生那麼隨便浪漫，你以為打掃放映室會很勤力？第五區二輪戲院地方本來就淺窄，提供一種圍爐取暖的額外樂趣，小小的空間空氣不流通可以想像，後生嗰陣托賴還算身壯力健，毋庸一日一蘋果醫生也遠離我，老來抵抗力一落千丈，狂蜂浪蝶吸引不到，倒廣受病毒歡迎，雖然不至於次次散場後都發現領嘢，感染次數一年起碼三兩次是免不了的。病開有條路，既然黑暗空間飄浮的感冒細菌摸熟了我的呼吸系統，念在同宗之誼指引冠狀啲friend合力進攻有幾難？
各地風俗不同，病毒滋生位置也不一樣，就像傳堂食蘭州拉麵的照片給紐約的K欣賞，他一見立即噼嚦啪嘞追問：「全場是否得你哋一枱？有冇親眼睇住大叔用滴露抹筷子？食完有冇即刻入廁所洗手洗面洗鼻？入廁所前有冇用酒精消毒廁所門把手？」當堂嚇到我口窒窒。乍聞住十八樓C座的港胞出入搭電梯，輪到我成為緊張大師：「吓，乜你冇留意個𨋢裏頭武肺病毒開緊P？點解唔行樓梯？慌死梯間有露體狂對住你露械乎？」得悉出咗𨋢仲要搭地鐵返工，更加花容失色，彷彿目睹他們為五斗米踏入死亡陷阱，差一點要伸出手阻止自殺行動，忘記自己身在法租界，遠水救不了近火。