八方身邊唔少親戚朋友同事，近期都為BNO頻撲；反觀香港啲高官親人，好多都有外國護照，當然唔會明白小市民嘅苦況啦。話說特首林鄭月娥星期二晚，喺中國發展高層論壇網絡簡報會致辭，話自從全國人大決定訂立港版國安法之後，有大量來自外國政府嘅不公允批評。佢總結呢啲批評係「雙重標準」和「偽善」，話所有指控中國嘅國家，本身都有國家安全法。
老公同仔仔都係英籍嘅林鄭仲話，聽到好多外國人講，要畀香港人擁有外國居民資格，或者威脅要制裁香港，聲稱同香港人「站在一起」。但林鄭形容，呢啲外國人講嘅都係「花言巧語」、「偽善」，話要放長雙眼，睇吓當佢哋國民嘅反應或政治環境，令呢啲「撐港人」行動變得不受歡迎嗰陣，會變成點樣嘅結果喎，不過好多網民就揶揄林鄭，若然佢覺得外國人咁衰，為乜唔叫老公同仔仔快啲放棄英籍，合家做偉大的中國人呢？