無論有冇港版國安法，香港民主派今年9月立法會選舉要入閘，都係高難度動作，京官早已向多名民主派發出DQ警號，莫須有話佢哋違反誓言，其中主持內務委員會主席選舉嘅公民黨法律界議員郭榮鏗（DK）更多次被點名，已成DQ高危族，DK亦做足工夫打點定「後事」，積極物色Plan B，據聞一位行內德高望重嘅神級大狀，最終答允亂世中扛起時代畀佢嘅重任。
郭︰感激在惡劣環境站出來
查實呢排唔少民主派，忙於搵Plan B多過備戰，因為北京嗰把DQ利刀，無定向喪心病狂間歇性全身機能失調，隨時對人殺無赦。據聞向來對人對己要求極高嘅DK，幾經尋覓，終於搵到Plan B，雖則係Plan B，實質係前輩，據聞喺法律界德高望重，行內極具份量地位，過往捍衞人權民主自由嘅角色鮮明，公眾亦對佢都有所認識。
咁究竟係邊個呢？政界同法律界噚日都估唔同人選，有人估係咪港大法律學院教授陳文敏？定係大律師公會主席、人權律師戴啟思？定係近排不時為反送中抗爭者辯護的神級大狀駱應淦？有知情人士同八方講，呢堆名似乎唔中，佢話名就唔開，呢個神級Plan B專打民事案、做過大律師公會主席、行內係人都知佢對某隻顏色情有獨鍾。
八方向DK查詢，可能時機未到，暫時未能揭盅。但佢明言好開心有人願意出選，特別敬佩對方喺如此惡劣政治環境之時，都有勇氣站出來。DK提早物色後補，無非向政府表明，就算DQ咗郭榮鏗，追求民主公義嘅法律界，都係唔會退縮。中共同港共政權想嚇退法律界？引用DK金句：慳啲！
李八方