現年30歲的林作和31歲失婚裕美前晚被《蘋果》獨家斷正拖手拍拖，令戀情曝光。事後向兩人求證時，顯得十分避忌，原來最大的阻力是林作母親Lily不滿未來新抱，更說兒子是「玩玩吓」。林作前晚在Ig發千字文護花，兩度暗指母親歧視女友。裕美昨日則手戴林作所送的鑽戒接受訪問，大爆林作已多次求婚，更明言︰「反對打擊唔到我」。
林作與裕美戀情在前年年尾已悄悄萌芽，不過林作之前與十優港姐麥明詩拍拖時被指博上位，因此今次決定封口。前晚戀情曝光後，《蘋果》以短訊訪問林作媽媽Lily，林母似不喜歡裕美，劈頭第一句已說不知阿仔拍拖，亦指未見過裕美。當問到會否叫林作介紹女友及想早些飲新抱茶，Lily指：「我個仔以事業為重，玩玩吓唔使咁認真，所以毋須介紹。」記者指林作很愛裕美時，Lily大唱反調：「應該唔會好鍾意。」是否介意裕美離婚及學歷低？Lily未有否認：「仔大仔世界我都唔想管佢咁多嘢。」態度與早幾年林作和麥明詩拍拖時差天共地，當時Lily曾公開大讚麥明詩「好乖好孝順」。
「愛我多過我愛佢」
裕美昨日接受《蘋果》專訪，她卻直言曾與林作母親見面︰「佢媽咪知我哋拍拖，上年生日見過。」問到林母當時的反應，她說︰「冇反應喎，但feel唔到佢唔鍾意我，因為一大班人。」至於林母指林作玩玩吓，裕美說︰「哦，你知佢之前好多女。」提到林母直言兒子「唔係咁鍾意」她，裕美強笑︰「林作唔係咁鍾意我？我即刻打畀去問吓佢先。」裕美邊打電話邊手震，林作隨後以短訊表示自己在開會。問林母落閘會否令她傷心，她指︰「唔會，佢都唔了解我，唔會好hurt，我諗伯母都好大壓力，唔知點應對記者。我唔會受任何人影響，我相信林作愛我多過我愛佢，哈哈哈，但我都幾鍾意佢。」
裕美更坦言林作已向她多次求婚，但過去幾段傷心經歷，令她要考慮清楚︰「佢同我求咗好多次婚，得閒攞拖鞋、攞咕𠱸，求你嫁畀我。同埋佢以前飲酒飲得幾犀利，飲咗會裸體，鍾意好多人面前除晒衫，佢攞隻拖鞋求婚就係飲醉嘅時候，我話咁樣好差，唔尊重我，佢因為咁戒咗酒。」
談到手上戴的是否求婚戒指，裕美說︰「你問佢本人，我都唔知，佢送咗畀我。」是否求婚時送？裕美謂︰「我覺得係求其畀隻戒指我，幾時結婚隨緣，唔強求，最好佢媽咪同意。」再問她林母的反對會否對這段情帶來沉重打擊？她堅定說︰「打擊唔到，好多人都反對我嘅人。林作對我好好，有一種好實在好貼地感覺，唔係激情嗰隻，但有安全感。」裕美更表示會好好照顧林作，如果林母有不滿：「隨時面對面同我講，我係會改善。」
斥母歧視失婚女性
其實林作不但支持裕美接受訪問，前晚亦發千字文認愛撐女友，形容裕美「人格、品行、道德觀近乎完美」，更指網民，包括自己母親，也歧視失婚女性，強調裕美「失婚無罪，只是前夫PK」，又暗寸母親︰「本人母親出身極低，絲毫不減本人對母親的愛戴。」最後指與裕美「十分幸福愉快」。而麥明詩對林作戀裕美，也大方表示：「祝福，其他冇回應。」
峯迴路轉：否認拍拖 兩日後認求婚
《大前日》
21:50 林作與裕美被本報讀者發現，在尖沙嘴海港城一間餐廳撐枱腳。
23:00 林作和裕美手拖手離開餐廳，十指緊扣前往停車場取車，林作連聲否認拍拖。
《前日》
下午 裕美接受《蘋果》電話訪問，她甜笑說：「我唔知呀！」又堅持等林作先回答。林作以短訊回覆指：「不會回應任何緋聞。」
晚上 林作母親接受《蘋果》訪問，第一句已說不知林作拍拖，並指林作只是「玩玩吓」。
23:58 林作在社交網撰寫長文認愛裕美，並開腔護愛，強調自己不介意對方會考0分。
《昨日》
下午 裕美接受《蘋果》專訪，坦承林作已經多次向她求婚，右手無名指更戴上鑽戒。