【惡法臨城】
【本報訊】港版國安法即將落實，今年書展或成法例實施後第一個文化展覽。主辦書展的貿發局副總裁周啟良回應會否審查書刊時稱，書展「從來都冇censorship（審查制度），要靠業界自律」。有參展商認為，出版業自我審查問題越趨嚴重，「業界會驚做唔做？印唔印？」有書店創辦人則指貿發局言論多此一舉，製造寒蟬效應。
過去有不少參展商在書展擺賣政治書，對於港版國安法壓境，貿發局會否主動審查書商？周啟良昨回應時強調，書展從來沒有censorship，但提醒業界自律，「係法律框架進行，所有違法都唔可以喺書展展出」。記者再追問，若主辦方發現有違例書籍會否介入時，他僅重申書商要跟隨法律框架擺展。對於有藍絲團體預告踩場「掃（港）獨」，他強調書展是一家大小、鼓勵健康閱讀的地方，籲公眾表達政治訴求時不要影響他人，否則會要求離場。
書室創辦人斥製寒蟬效應
書展參展商CUP媒體執行總編輯陶培康表示，港版國安法條文未公佈，業界對於法例存在很多疑問，「之前做落、印落（啲書）又得唔得呢？」即使未有港版國安法前，「大家都越來越驚，會擔心，唔敢做」。他又指，書展擺賣的書籍暫時沒有改變，「但有晒心理準備（可能會變），最終都係睇條文」。
陶培康續說，對港版國安法感到擔心和憂慮，「實際上未出，好難講點影響。我哋有本書叫《THIS IS HONG KONG 從前，有個香港》係捷克作家畫以前嘅香港繪圖，有英女皇皇冠，同事都問我驚唔驚，但暫時都照去」。他透露，有書店入書時可能會「斬腳趾避沙蟲」，「因為書店好被動，覺得內容吸引就會入，但唔會吓吓睇晒成本書，可能出咗少少問題都唔知」。
序言書室創辦人李達寧雖未曾參與書展，但認為貿發局的回應「好怪」，反問「以前（參展商）係咪唔守法律？可能係製造寒蟬效應」，批評貿發局多此一舉。他又指，香港過去出版書籍較多受《淫褻及不雅物品管制條例》規範，「問下佢（貿發局）係咪意有所指，作為書商唔通唔喺書展擺又唔使守法咩？」對於港版國安法殺到，他感到擔心，「首先要睇條例（內容），睇吓係咪出個禁書名單，只怕佢係好模糊」，暫時持觀望態度，「如果講明禁書名單，因為犯法都會下架」。