香港人近呢一年經歷風雨飄搖嘅日子，好多人𠵱家同人做朋友，都會睇顏色，圍爐取暖自取其樂。至於喺娛樂圈中，就有好多人因為社運加疫情，搞到冇工開待業中，好似喺呢個圈撈咗幾十年嘅「阿水」，幾十年前靠住巨星「牛肉乾」嘅聲望，喺內地都搵到啖食，不過自從兩個冇合作之後，阿水呢幾年就要成日炒冷飯食老本。早排疫情未咁嚴重嘅時候，佢就喺內地拍戲，仲開晒口話會搵香港藝人做，口口聲聲話要幫同業，但原來背後係有目的嘅。
暗示要識做
事緣同阿水識咗十幾年嘅甘草演員「大力」，早排因為冇嘢撈，又聽到阿水吹雞返內地拍戲，就膽粗粗打畀阿水問有冇角色啱自己，諗住大家相識一場，大力自己又唔係要做啲乜嘢主角位，阿水應該唔會托手踭。阿水係就係冇say no，不過佢竟然提出一個離譜嘅要求，就係叫大力帶啲違禁品畀佢拍戲嗰陣提提神，仲明示暗示大力如果想有嘢撈，就要識做。
雖然大力想開工，但都知咁做嘅後果會好嚴重，為咗雞碎咁多錢而鋌而走險，絕對唔值得，所以最後梗係冇應承啦。之後大力都有同身邊朋友呻，話估唔到識咗阿水咁多年，佢嘅心地竟然咁差，叫自己做啲咁嘅事，呢種朋友真係要唔要都罷。
撰文：Jessie
本欄逢周三刊出
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
