CNN有篇報導，指在疫情期間，美國失業人數大幅度上升，領取失業救濟金人士以千萬計（三千至四千萬美國工人失業），偏偏美股從低位，一萬八千餘點彈升至二萬六千幾點（升44%），日益凸顯貧富差距持續擴大，全無改善跡象，直接助長目前美國之反種族反警暴示威運動。
經濟不景時股價上升，當然要多謝各國央行以美國聯儲局為首，實行無限QE所致。左丁山不止一次指出，2008年後之QE，大大助長世界性貧富懸殊，令持有財務資產人士愈發富有，令無產蝸牛日益絕望，係一個社會不穩嘅大因素。今年有世界性疫情，更令中產白領、專業人士都失業、失去收入，大批人士向下流（日本名詞，由中產跌落無產），即使各國政府推出大量扶貧措施，派飯、設關愛基金，有鬼用咩，扶貧嘅資源，與QE比較，只能算係九牛一毛，有天淵之別。所謂扶貧，只夠錢買跌打酒治吓皮外損傷，完全唔夠恢復元氣之用。
左丁山呢類不上不落，不能上流，只好力保不下流之人，只能提醒自己，知足常樂。但馬主F就係股市上上落落嘅得益者，集中炒即日鮮，恒指近25,000點區域就沽空，23,500附近就買入期指，經常執番三幾萬一日，呢日為咗慶祝抽唔到馬，又搵左丁山去九福食蟹黃翅撈飯，與左丁山講：「我都知有貧富懸殊，但央行QE，明益我呢類炒家，唔執番少少，對央行唔住，我唔賺，對沖基金經理都賺嘅啫，我每日執番三幾萬過日神，良心非常安樂！」更安樂就係食九福蟹黃翅！馬主F話最近呢次抽馬，雖然今年抽PP（自購馬）有七成機會，但佢竟然抽唔中，於是本來準備咗嘅五百萬養馬費（二百萬買馬，三百萬養馬三年），可以慳番，相等於幾千碗蟹黃翅。養馬非常花錢，八九成機會蝕大本，你估會買到「美麗傳承」、「時時精綵」咁好運咩。既然慳番咁多養馬費及在即日鮮搵銀，多食靚嘢無妨，但食得多會否傷身？馬主F又有醫生睇住，未食就先吞幾粒藥丸，要保健康咁講！佢又自爆簽咗名支持國安法，因為大班有錢朋友「被動員」支持，佢唔想做異類，於是簽埋一份，馬主F話：「我鬼識政治咩，我地班人個個全家有澳加紐英護照，只係唔捨得港式生活，唔願走而已。」馬主F識得一個隱形富豪，相當低調，點知亦被有關人士睇中，有人日日來電話叫佢表態，於是隱形富豪亦無奈表示支持國安法，等林鄭可以吹牛話香港民意支持國安法。
馬主F係香港「上流」精仔中之典型，若國安法震散香港，佢地可以話咁快返回自己國家（不是中國），與「下流」愛國派一齊等待政府關愛完全不同。真正想香港民主自由繁榮平等之人，多數係冇外國護照庇護之「中流」黃絲，被夾在中間，要長期掙扎。