通訊局之前連環郁港台，搞到《頭條新聞》都摺埋，噚日通訊局又裁定兩個針對港台投訴成立，但只有一單發警告，另一單就冇，而冇發警告嗰單，咁啱係涉及中央電視台，自然惹人聯想。
通訊局話違規但唔罰
點解中央電視台令港台畀人投訴？原來係舊年9月，港台電視33同33A，分別轉播中央電視台綜合頻道嘅《天氣預報》，點知係轉播期間，節目同廣告時段中播出某酒精品牌嘅廣告同贊助，涉違反合家觀賞時段內不得播放酒精產品廣告嘅規定，既然斷正通訊局就要裁定投訴成立，但就話港台對轉播節目內容沒有決定權，決定不作懲處。
至於其中一單係港台第三台舊年12月一個英文音樂節目播出帶有粗俗用語嘅歌曲，通訊局裁定投訴成立，又話港台係兩年內第三度違反規管用語條文，決定向港台發出警告。通訊局今次對港台咁寬宏大量，知道合家觀賞時段播放酒精產品廣告其實唔關港台事，所以唔罰港台，只叫港台要同央視保持緊密聯繫，日後嚴守有關規定。有網民就話，如果轉播節目唔係CCTV製作嘅，而係其他國家電視台節目，通訊局又會唔會咁通情達理呢？