胡杏兒在2015年與商人李乘德（Philip）結婚，婚後誕下大仔李奕霆（Brendan）和細仔李奕霖（Ryan）。細仔Ryan日前一歲生日，杏兒在Ig貼出一家四口的溫馨合照，又用英文感性剖白心情，指在平凡的日子，就是幸福的一天。
感恩大家喜歡囝囝
「今天是非常特別的一天，因為Ryan一歲生日，對爸爸來講，是他第一個有兩個兒子的父親節，對於Brendan來說，今天是他變成最愛超級英雄Ironman的一天……對媽媽來說，這是一個非常幸福的一天！」
杏兒經常將一對兒子的生活照片放上社交平台分享，記錄兒子的成長過程，由出生、飲奶、學行、游水、上學等，搞笑溫馨樣樣都有，十足育兒成長大全。杏兒笑咪咪的說：「其實我哋拍咗好多囝囝嘅片，大家見到我post嘅只係百分之一，相信每個家長都會咁做，希望留低多啲小朋友嘅回憶。好感恩大家都喜歡Brendan同Ryan，佢兩兄弟性格好唔同，但一樣係happy baby，帶咗好多快樂畀我哋，所以有時share出去，係希望將呢份快樂傳畀大家。」
「遺傳咗我嘅基因」
Brendan早前因疫情停課，杏兒透露他因此睇多了電視：「佢近排學識跳《江南Style》，又識跟拍子同擺pose，可能真係遺傳咗我嘅基因，哈哈！」婚前杏兒一直是工作狂，做了媽咪後，學懂了工作與家庭平衡：「我盡量喺唔使開工嘅時候，抽時間陪兩個仔，小朋友成長得太快，更加珍惜一家人相處嘅寶貴時間。」
做了媽媽後，杏兒拍片、工作的形象包袱都大解放。她之前為ViuTV外判劇集《熟女強人》首次飾演性治療師，早前又以一身全白專業套裝look，拍女性護理產品新廣告，更有女性尿滲等話題。她表示一點都不覺得尷尬：「其實尿滲係一個正常同普遍嘅問題，大家唔需要覺得羞恥，或者怕醜而唔去面對呢個事情，因為唔處理嘅話，可能會發生更尷尬嘅事情，有需要而用到尿滲護墊係好正常嘅事，就等於我哋面對疫情一樣，要正面面對，不時給自己正能量。」
更多精采時尚內容，盡在 http://add.appledaily.com。