俄超球隊莫斯科戴拿模周日宣佈，隊內嘅前鋒尼積爾、中場卡保尼同埋施文斯基中咗武肺病毒。球隊原定喺當日作客卡斯洛達，不過因為有球員中招，對手都同意遲啲再踢。俄超呢排係咁出現球員確診個案，另一支球隊羅斯托夫（圖）上星期更加有六個球員中招，全隊需要隔離，搞到球隊喺上星期嘅聯賽被逼派青年軍應戰，慘被對手索契大炒1:10，不過俄羅斯足總同俄超賽會都話冇計劃腰斬今季聯賽。