獻世派近排個個當自己參加才藝比賽，輪流表演歌喉獻媚示忠，繼「鼠王芬」早排整咗首聽出耳垢嘅《點解要攬炒》後，「戰狼縱隊」成員「何妖」何君堯亦同佢嘅隊友黑超哥、大衞Sir同華記出首撐國安法嘅《國護君安》，仲吹噓獲央視全國首播。
冇戴口罩拍MV
呢首所謂嘅歌，由香港政研會執行主席鄧德德（鄧德成）負責作曲填詞，無論旋律同歌詞啱唔啱音，都挑戰緊人類認知新低點，歌詞隻隻字八方都識，但放埋一齊就唔明佢講乜，例如劈頭第一句「攜着勇氣 取得香港國安法」，究竟勇氣點「攜」？國安法又點「取得」？「據理力爭」又點樣同「針鋒相對」並列？仲有咩係「萬眾出心有天理」？「維護國法」又點解同「品格」有關，仲要「受讚美」？最離奇係偉大嘅中華人民共和國係奉行共產黨領導嘅多黨合作同政治協商制度，但首歌名竟然講「君安」，唔通呢班人心懷恢復帝制嘅野心？
不過，最令大家擔心係呢班人全力散播「港毒」！八方睇片發現大部份亮相嘅人都冇戴口罩，須知抗疫尚未成功，呢班人已經無視衞生，喺尖沙嘴星光大道戶外拍片對公眾造成嚴重衞生風險，「品格」絕對唔應該「受讚美」。其實限聚令上星期五先放寬到50人，佢哋仲有犯法之嫌，唔知Popo見到又會唔會調查同叫佢哋自首呢？
李八方