由去年抗爭及今年爆發疫情下，香港逾600場騷需取消。林日曦前晚在社交網公佈於下月2日起舉行10場《林日曦細聲講：半厭世》talk show，成為限聚令下首個重開的演出節目，但因限聚令關係，場館只能開賣一半數量座位。他坦承租場有小優惠，明白各有難處。
林日曦以半厭世為主題，用屋企比喻香港：「有時都好厭世，香港好污糟，啲人好污糟，有時自己都好污糟，污糟包括有啲人做出嚟嘅行為好污糟。」但港版國安法殺到埋身，林日曦開騷可會怕觸及國安法？他說：「我覺得係冇得驚，國安法係乜？你唔知我唔知，模模糊糊等大家驚，你要驚就好多嘢要驚，所以只能夠話冇得驚，寫咗嘅嘢都係繼續咁講。」