【黑鏡線索】
Trump前幕僚John Bolton出咗本新書，爆Trump過去反中立場唔夠堅定，引起注意。較早前仲有另一個美國政壇人物出書講反中，作者係前眾議院領袖Newt Gingrich，香港人比較記得佢當年係克林頓嘅死對頭。
書名叫《Trump vs China》。Gingrich不嬲係惹火人物，尤其係佢喺八九十年代，為整頓共和黨帶嚟對美國議會生態嘅改變，非常爭議。本書有趣嘅，係可以用嚟了解多啲美國政壇，至少共和黨鷹派，點樣向（仲會睇書嘅）群眾，包裝同推銷對抗中国。
文字遊戲 美國中招
上次提過，自由世界嘅人，好容易跌咗落「同字異議」嘅陷阱，條件反射咁用自己世界嘅認知，套咗落理解中国嗰度，咁就領嘢。關於呢方面，Gingrich舉咗兩個例子，解釋美國人，包括學界同媒體，點樣中招。
第一個例子：中国最高領導人，對外國嘅銜頭，係「國家主席」，英文原本係“State chairman”。但後嚟中国將個繙譯，改咗做“president”。據《紐約時報》推斷，改做同美國總統同一隻英文字，係為咗令一般美國人將明明係共產列寧嘅專制系統，誤以為近似自己美國嗰套嘅政治模式。
第二個例子：「中国夢」，中国官方英文繙譯，係“Chinese dream”，而唔係更接近中文原意嘅“China dream”。明明成個「中国夢」，係由上而下，由權力頂峯嘅意志強加落人民到，但譯成“Chinese dream”，啲美國人就會自然誤會咗，係中国人民自發共識，等同美國“American dream”嘅中国版，等量齊觀。
第五難關 反中刻不容緩
對抗中国，係幾逼切幾危急嘅事？Gingrich用咗最高格調嘅比喻，佢話，美國自有史以嚟，總共遇過四個大難關。第一，係武裝起義，脫離大英帝國獨立。第二，係美國內戰。第三，係二戰對付納粹德國等軸心國。第四，係對抗紅色蘇聯。
而第五，就係對抗已經坐大嘅列寧中国。佢強調，頭四次，大家而家有倒後鏡，知道答案，會不自覺以為嗰四次嘅勝利係必然。但事實係，冇一次容易，次次都係惡鬥，次次都輸得，今次都唔例外，輕敵真係會輸，輸咗好大鑊。
要留意，呢本書係喺上年10月出版，出版嘅時候係未有武漢肺炎，應該話可能武漢已經出現肺炎，但係中国以外未知。唔知未有武肺之前美國人對抗中呢個idea有幾受落，但肯肯定武肺之後容易明咗好多。
10月出版，斷估截稿時係未有反送中。所以本書冇提過光時革命，搜尋一下，發現成本書，提咗香港總共11次，比起55次嘅台灣少咗一大截，可見一年前，美國眼中，香港人立場模糊。但有理由相信，下一次修訂版，Gingrich係會將香港經驗放大，着墨多好多，畢竟香港人嘅抗爭，已經將呢塊彈丸之地，變成自由世界盟友眼中嘅bastion of freedom。
撰文：宋漢生
fb : sunghsblog