港大法律學系副教授戴耀廷同前立法會議員區諾軒等人計劃喺7月11同12日搞民主派初選，到時全港五區大約要開250個票站畀巿民投票，由於今次用電子投票，所以需要千幾部手機或平板電腦，不過佢哋已經要籌錢搞初選，冇額外錢再買手機或平板，所以佢哋呼籲巿民將舊iPhone或iPad捐出或借畀將協助搞初選票站嘅民主派議員辦事處，令初選順利進行。
轉贈香港民意研究所
區諾軒話目前初選面對最大技術困難，係未有足夠電子設備供票站用，因為唔想出現過去特首選舉公投期間，民主派電子投票系統畀黑客進行分散式阻斷服務（DDoS）攻擊而癱瘓，所以初選改為以「線下」投票模式做基礎，要票站人員透過手機或平板，再加初選團隊特設嘅程式，為投票巿民進行認證，由於每個票站至少要四部機進行身份認證，所以夾埋需要用上千部。要用iPhone或iPad係因時間所限，暫時只完成用於iOS系統嘅程式。
戴耀廷亦喺fb話，今次係初選籌集得到嘅器材，將轉贈畀香港民意研究所。有意捐機市民可WhatsApp 6057 6197，安排交收事宜。