西甲上周六又踢咗四場，其中上仗贏奧沙辛拿五球嘅馬德里體育會，復賽後首次主場出擊就滾魚生粥，要踢到完場前九分鐘，先由後備上陣嘅馬捷恩佩雷斯喺角球混戰下頂向空門，雖然華拉度列後衞立即解圍，不過VAR翻睇後確認個波已經過晒白界，結果馬體會只能小勝1:0，但都足以升上第三位。至於榜尾嘅愛斯賓奴，雖然有中國球王武磊連續三場正選，但球隊最終主場以1:3輸咗畀利雲特，護級形勢險峻！武磊上季嘅愛斯賓奴教練魯比，今季轉教貝迪斯後戰績麻麻，球隊聯賽重開後先喺打吡戰輸畀西維爾，上禮拜六再輸畀畢爾包0:1，賽後貝迪斯立即炒咗魯比，成為疫情後第一位落鑊嘅西甲教練。