幾年前經電腦J介紹，認識白帽子（White Hat）K，簡稱白帽K，白帽K平時好忙，難有時間一聚，呢日佢竟然叫電腦J搵埋左丁山去吃午飯，碰啱無事，一於應承，去邊度食好呢？電腦J話想起「唐人館」，不過唐人館隻填鴨靚，午飯日日爆滿，好難訂位，左丁山諗起IT人不拘一格，衣着隨便，不如去開放形，夠晒輕鬆嘅Cadillac，有大把位。白帽子雖在中環返工，也無異議。
Cadillac啲前菜如Potato Skin、炸魷魚非常惹味，碰正天氣熱，最好飲凍啤，可惜飯後要揸車，白帽K與拍檔要去九龍開會，電腦J唔想一個人飲酒，於是全部飲清水，夠晒純情。還未點菜啫，虎媽A急call話有朋友8月移民加拿大，想七月訂尖沙嘴Rosewood嘅印度菜餐廳Chatt食晚餐送行，問左丁山有無辦法訂到位。虎媽A平時百足咁多爪，居然搵左丁山訂枱，事有可疑，於是搵相熟朋友訂位，收到回覆：「真真對唔住，七月滿瀉，八月好爆，不如九月初啦，搵個好位畀你！」嘩，又話餐飲業不景嘅，乜呢間Chatt咁猛料，訂晚飯要去到九月呀！鄭小姐真係有辦法，搵到一間咁有號召力嘅印度菜餐廳在Rosewood開舖營業。香港高檔餐廳中，印度菜好似冇乜，估唔到呢間Chatt，一開就爆紅，曼谷有一間Gaggan，經常名列亞洲五十最佳餐廳之內，以新派印度菜馳名，廚師Gaggan Anand先生好有性格，在2017年宣佈Gaggan於2020年結業，移居日本福岡與好朋友開一間GohGan，2021年啟業，只有12個座位，到時肯定一位難求。
白帽K聽見Chatt咁爆棚，為之心動，話要搵日去試試，叫左丁山安排，咁就要等夠三個月嘞。問白帽K最近有冇生意，佢話疫情之下，生意更好，因為佢條team主力為客戶對抗黑客入侵，致力維護客戶之電腦系統安全，幾個月來，視像會議、虛擬店舖活動大增，譬如Zoom就發到唔清唔楚，但好多人用呢類軟件，不知危險，於是中招，大多要白帽K去救援。白帽K話：「呢，一間上市公司啱啱中招，被黑客入侵，名字唔講得，我地今日下午要緊急行動。」左丁山係科技盲，唔係幾聽得明電腦J與白帽K講乜，只能間中插吓嘴。佢兩位一致同意用Window有不少安全漏洞，微軟係知嘅，但微軟有一隻好勁嘅軟件保護Window不受侵襲，要另外購買，於是微軟財源廣進！世界上有黑客惡意搵錢，就有白帽子應運而生，充當電腦安全保鑣。白帽K叫左丁山見到有IT人搵工，不妨介紹畀佢面試一下，睇吓會否啱用，佢隊人幾年間急劇擴充10倍，現在已有百幾人，仲要繼續招聘！