早排港大微生物學系講座教授袁國勇同佢團隊喺國際醫學期刊發表有關武漢肺炎研究，推算湖北省有220萬人可能已受感染，結果俾港區全國人大代表、工聯會吳秋北批評佢係「美國強有力的外援」，呢單嘢事後俾好多醫學界人士批評吳秋北扣袁國勇帽子，但估唔到連袁國勇昔日同窗，全國政協委員、食物及衞生局前局長高永文都加多腳，批袁嘅研究「太片面」唔夠代表性，高嘅言論又再辣着同行，質疑本身係骨科醫生嘅高永文，憑乜去批評微生物學權威嘅袁國勇研究太片面？
蔡堅轟打壓學者
高永文日前接受網媒訪問質疑，話研究引用數據太片面，質疑如果淨係基於港人喺湖北返嚟嘅樣本，係咪有足夠代表性代表湖北省普遍市民呢？佢認為唔值得用一啲比較片面嘅資料，去做一個咁重要嘅假設，然後投射一個數目出嚟，又話部份專家經常講述「worst scenario」，希望增加市民危機感，但佢認為不論出發點係乜，作為專家應根據實證科學。
不過醫學會會董蔡堅完全唔認同高嘅講法，反問高永文做過幾多呢啲傳染病統計學嘅研究？去comment一個唔係佢範疇嘅專科，俾人睇到好政治化，蔡堅仲話由呢件事睇到打壓學者已殺到埋身！