大陸強推港版國安法，口口聲聲話為香港好，但原來口裏說得，文宣卻很誠實。為撐惡法，官媒《人民日報》整咗張「國安法為香港經濟撐腰」圖，大中細三個齒輪互相卡住，大嗰個係國安法，其他兩個係香港同經濟，原意應該係表達香港有咗國安法之後，經濟就會不斷上升。不過好快有網民發現，睇真啲咁嘅配置，稍有物理常識都會知，結果只有一個，就係三個齒輪會卡住，想郁都郁唔到。
盧覺強：最細嗰個先崩牙
網民起初仲以為係改圖，搞清楚之後就開始高汁物理學討論，有人話係完美描述緊當國安法個齒輪一揳入去就會卡死香港經濟；亦有人話實際會更大鑊，因為國安法個齒輪最大，當夾硬郁時，一定整爆細齒輪，即係代表香港玩完。八方唔識工程，走去問工程師盧覺強，究竟呢三個齒輪郁唔郁到？盧覺強睇完亦都話似乎唔多可行，「就咁睇幾個唔會識郁，但如果一直畀power個大齒輪，咁最細嗰個（香港經濟）咪最易崩牙逼開囉」，似乎《人民日報》呢個文宣又係同北京倒米。
其實《人民日報》唔係第一次出事，八方記得佢之前出過張寫住「打港獨、救香港」嘅黃底文宣，但「打救」兩隻字玩重叠，於是令人左睇右睇，都只係睇到「打救港獨，打救香港」。呢個文宣係官媒搞，絕對唔關民主派同香港網民事，唔通連《人民日報》都預視強行立法，即係中共可以攬炒？難怪有網民成日笑《人民日報》暗黃，又講笑話唔知入面係咪有手足喇！
李八方