「死因無可疑」這組字，過去一年聽得多，萬般滋味。林嘉欣和黃秋生主演的驚嚇片《死因無可疑》大後日上畫，講的不是無名浮屍、少年跳樓，而是由呃保險引發的連串恐怖事件。林嘉欣再次自虐式開工，增肥10磅、不染頭、不修甲，又長時間戴特製隱形眼鏡，只因按老公兼導演袁劍偉要求，變身單眼瘸腿、爛賭暗黑中婦，「角色同我實在太唔同，所以我冇話抽離唔到。」
現年41歲的林嘉欣影相時總是嘻嘻哈哈，吃着牛角包時邊講笑，一埋位就變了另一個人。林嘉欣是典型同自己過不去的演員，越大挑戰越喜歡，醜女、性格扭曲的全沒問題，新作《死因無可疑》為演單眼暗黑中婦角色，特意增肥10磅、不染頭、不修甲三個月，又不理醫生的四小時佩戴指引，長戴特製隱形眼鏡拍片。「辛苦！但我鍾意用呢種唔方便、唔舒服去幫我（入戲）。當我戴con時，有一邊眼係睇唔到，好吃力，咁要用耳仔帶動個人，成個形態都唔同咗，到我一除咗con ，就變返林嘉欣喇。」
到賭場觀摩
從未去過賭場的林嘉欣，特意到澳門賭廳觀摩中年師奶如何賭錢，她發現女賭徒身上衣着總有點紅紅紫紫，怪動作又多多，「咁大個女未去過，我一埋位就俾個荷官喝，『阿姐，呢度講手勢㗎！』我俾佢一鬧，就好似啞咗咁，咁我就放一千蚊，劇組嘅錢嚟，好驚，最尾贏咗三千蚊，我唔玩喇！原來真係好緊張。」
講到拍鬼片、黑暗格局電影，林嘉欣拍過多部，也試過無法抽離角色，多年前拍《百日告別》時，戲中喪夫的情感，和現實中她父親離世的傷痛交織，「嗰時嘅感情，真真假假我都分唔到，比較難抽離。」人生最恐怖的一件事，同樣是拍片，而該片是與張國榮（哥哥）合作的《異度空間》，「其實拍完嗰部戲之後，我唔係好夠膽拍鬼片，可能係由於哥哥最後嗰件事啦；同埋嗰段時間唔知點解，我成日成身瘀晒，嗰時我有少少疑神疑鬼。拍鬼片都係夜戲多，咁你個人又唔夠瞓，加上嗰時我自己一個人住，啱啱嚟香港冇幾耐，冇人冇物，又冇朋友可以傾訴，嗰時個狀態好怪，我好深刻，覺得好恐怖，我又唔係見到啲乜喎，但到今時今日，諗起都打冷震、毛管戙。」
愛上玩陶泥
新片以詐騙保險做主題，林嘉欣25歲才買保險，反而囡囡一出世她就做足準備，買定教育基金類保險，「啲女就一出世買，主要買教育個類，咁到18歲就本連息拎返，好安全。」過去幾個月留家，接送囡囡上陶泥班，林嘉欣更瘋狂愛上在Ig上傳玩陶泥拉坯的相片，整花瓶、咖啡杯，「嗰女都問『媽咪你愛我多啲，定愛陶瓷多啲。』」
疫情期間，林嘉欣和分散各地的媽咪、姊妹日日video call，互相接濟口罩，感情更親密。另一得着是每日睇書，一次過掃清堆叠在床頭逾一年的兩三叠書，「我通常一次過開四、五本書，閱讀有一種感染力，有時有煩惱我會睇書，書未必畀到答案你，但睇完會好舒服。」除了看書，她亦愛寫信，每逢出埠工作或旅行，都會手寫明信片或信寄回家，「𠵱家啲人唔等得，但收信，你就會有一種等待、一種期待，咁幾好呀，人生裏面有啲嘢可以期待，唔使吓吓即食。」
更多精采時尚內容，盡在 http://add.appledaily.com。