英超球星個個有錢有名氣，唔使愁身邊冇女人，單身出嚟蒲就基本嘢啦，有另一半去偷食亦唔係咩新鮮事。好似「世紀賤男」曼城右閘基爾獲加，近年多次被踢爆背住女友去滾，今年仲爆出真人騷模特兒Lauryn Goodman懷有佢嘅骨肉，搞到正印Annie Kilner忍唔住嗌分手。但最近有消息話，呢位賤男唔單止成功同舊愛復合，仲向對方求埋婚，會唔會背後仲有好多段關係未撇清呢？
出軌開淫P臭史多
獲加同Annie已經有三位小朋友，但呢位鹹濕成性嘅球星頻頻出軌，同新女友Lauryn奉子一齊後，疫情期間又被踢爆喺屋企開淫P，仲被捉到喺網上睇脫衣舞騷。就算係咁，Annie仍然決定畀最後機會呢位賤男，據講兩人已經重修舊好，獲加仲打算畀個名份對方。
獲加使咗一大筆錢，喺大宅入面佈置大量鮮花，仲準備咗一個寫住「嫁畀我」嘅蛋糕求婚。浪漫簡直係女人嘅死穴，Annie之後將twitter頭像轉成兩人嘅合照，睇嚟獲加已經箍煲成功。其實佢哋曾經拍過拖11年，只係呢位英格蘭國腳成日偷食先搞到分手收場。但經濟上仲好依賴男友嘅Annie表明，只要男友同啲小三斬纜，就會考慮復合。不過江山易改，雖然求婚成功，但獲加可能仲背住女友，同好多女士有超越友誼嘅關係。
援交女生B要英超兵負責
出嚟玩又唔想咁早做爸爸，就請做足安全措施，最近又有單女子被英超球星搞大肚嘅新聞，一位26歲嘅援交女姬迪向傳媒爆料，話自己上年夏天收咗位匿名英超球星1,500鎊過夜後，意外發現有咗。BB今年三月出世後做咗DNA測試，證實嗰位球星係經手人，但對方居然唔想負責。
姬迪話嗰位球星係透過朋友介紹識到佢，上年六月起男方就幾次搵姬迪過夜，點知搞大咗個肚，覺得啲老友知道會好尷尬，佢亦唔想做老竇住。姬迪做咗媽咪後已冇接客，好彩男方家陣肯承擔責任，仲話每個月會定期畀生活費，但姬迪指呢件事未落實，希望對方睇到新聞後搵佢傾傾。
