受武漢肺炎疫情拖累，英甲早排已提早收「咧」，計完一輪平均分後攞到冠軍嘅高雲地利，日前就喺訓練場地搞咗個頒獎儀式，閉門自high一番。班球員唔單止企到鬼咁埋，一個二個仲連口罩都唔戴，真係睇見都覺得牙煙。不過，佢哋都總算有戴番對手套，先至輪流舉起個獎盃慶祝（圖），氣氛都算唔錯啦，利物浦遲啲如果真係贏到英超冠軍，都大可照辦煮碗。紅軍雖然捧盃在望，但最近就有傳佢哋嘅王牌射手、28歲嘅沙迪奧文尼（小圖），遲遲唔肯動筆續約。有消息就話，文尼眼見華基爾雲迪積克嘅周薪將有望加到22萬鎊，佢又要加埋一份，而法甲嘅巴黎聖日耳門同西甲嘅皇家馬德里都已經準備乘虛而入，用1.5億英鎊撬走呢位今季英超停擺前，入咗14球嘅塞內加爾國腳。