大家都知道香港有個國際電影節，每年春夏兩季為影迷提供嘉年華，但貿易發展局旗下的Filmart和電影節協會主辦的HAF，前者正名「香港國際影視展」，後者是「香港亞洲電影投資會」縮寫，因為以專業人士為對象，一般街客比較陌生，就像康城影展人人噏得出，附設的電影市場只有片商發行商熟悉。今年春季的電影節延至八月舉辦，剛剛展開宣傳攻勢，HAF則公佈改為網上形式，金主們留在原地透過視像和電影團隊交際，不會有任何身體接觸。我覺得這樣的安排才是與時俱進，兵來將擋水來土掩──港府處理疫情的手法離奇過神經刀，五時花六時變，譬如禁聚令室外緊過室內，便毫無邏輯可言，政治主導呼之欲出，關卡防守的大細超也早就傳為笑柄，腰纏萬貫的生意佬遠道而來，如果降落赤鱲角後發現必須與世隔絕若干時日方可自由行動，你話幾咁冇癮。而且殺到埋身的國安法，似乎連外國公民也難逃法網，冇事就冇事，有起事上嚟任拉任鎖任宰任割，領事館代為出頭還要被喝令勿干預中國內政，太牙煙了，係我就點都唔會冒險。
新常態的WFH遍地開花，又省力又環保，實在因禍得福，不過據說有些工蟻不習慣家居辦公，寧願擠一輪公共交通工具朝九晚五留守寫字樓，真是匪夷所思。安安樂樂坐在家裏工作，時間不是更鬆動嗎，開視頻會議上半身明艷照人，鏡頭以外的下半身可以着條睡褲撻對拖鞋，甚至褲都唔着，簡直風流快活。這方面我是老行尊，起碼二十五年毋庸出入辦公室，生性的話唔幫襯鞋鋪，慳慳埋埋夠買半山豪宅。