近日哥倫比亞名將艾斯派拿為同胞後輩占士洛迪古斯抱不平，話唔明點解皇家馬德里教練施丹唔用佢，仲火爆咁叫對方「食屎」。不過施丹一於少理，周四西甲皇馬喺臨時主場迪史提芬奴球場迎戰華倫西亞，喺占士繼續冇份落場下，憑賓施馬梅開二度同馬高阿辛斯奧嘅入球，三球淨勝後段打少個嘅華倫，繼續喺積分榜緊追榜首巴塞隆拿，保持重奪西甲冠軍希望。
占士上陣少過馬里安奴
占士今季聯賽只係踢過七場，睇番同施丹唔啱嘅加里夫巴利都上陣過15次，呢位28歲哥倫比亞中場的確幾慘。哥國名宿艾斯派拿近日受訪就講到占士喺皇馬嘅情況：「施丹又話隊內公平競爭爭正選，但佢嚟嚟去去都係用嗰3、4個後備。你唔好同我講世界盃神射手嘅出場次數仲低過馬里安奴戴亞斯，畀少少尊重吖唔該！係占士先咁忍得，我係佢就一早叫施丹食屎喇。」
雖然艾斯派拿咁火爆，但施丹當耳邊風，繼續用賓施馬、夏薩特等進攻球員鬥華倫。今場原本先開紀錄嘅係華倫，21分鐘洛迪高摩連奴接應麥斯高美斯嘅傳送禁區後上射入，可惜經VAR查證後發現高美斯越位在先，入球判無效。華倫慘食詐糊後喺下半場仲俾賓施馬接應夏薩特傳送，禁區輕鬆射入打破僵局。
炒華倫賓施馬第五多產
皇馬之後換入因傷唞咗近11個月嘅馬高阿辛斯奧落場，佢第一吓掂波就接應費蘭特文迪左路傳中「窩利」破網，幫皇馬領先到兩球，阿辛斯奧之後仲助攻賓施馬，幫呢位法國前鋒梅開二度外，仲令賓施馬嘅入球數增至243球，喺球會總入球數超越名宿普斯卡斯，成為史上射手榜第五位。臨完場前華倫有南韓小將李康仁領紅被逐，最後皇馬全取三分，繼續以兩分緊貼巴塞，誓要同佢哋鬥到底。
阿辛斯奧喺去年對阿仙奴嘅季前熱身賽膝部重創，原本今季收「咧」，但因武漢肺炎疫情令球壇停擺咗三個幾月，令佢可以回歸，今場仲交出1入球1助攻，賽後佢話：「我已經等咗好耐，可以重返球場真係好興奮，今場仲要入埋波，當然最重要係幫球隊贏波。」今季皇馬進攻球員配搭一直多變，洛迪高高斯同雲尼斯奧斯祖利亞兩位巴西小將雖偶有佳作，但就嫌經驗稚嫩表現較飄忽，阿辛斯奧或者有能力同賓施馬、夏薩特組成三叉戟應付餘下賽事，睇嚟占士喺皇馬仲有排坐。